Киин куоракка «IT-куб» аһыллара былааннанар

Дьокуускайга урукку «Ниагара» култуурунай-саататар киин дьиэтигэр (Горькай уул., 98/1) «Цифровой үөрэхтээһин эйгэтэ» бырайыак чэрчитинэн «IT-куб» цифровой үөрэхтээһин киинэ аһыллара былааннанар. Ол туһунан куорат баһылыгын бастакы солбуйааччы Алексей Корнилов иһитиннэрдэ. 
Куорат Дуумата 2021 сыл муус устар 28 күнүнээҕи быһаарыытынан «IT-куб» аһыллар дьиэтин хапытаалынай өрөмүөнүгэр 45 мөлүйүөн солкуобай көрүллүбүт. 

«Тэрээһин «Судаарыстыбаннай уонна муниципальнай өҥөлөрү оҥорорго табаары, үлэлэри хантараак систиэмэтинэн атыылаһыы» диэн Федеральнай сокуон 112 ыстатыйатын 56 чааһыгар олоҕуран хантараак түһэрсэн ыытар былааннаахпыт», - диир Алексей Корнилов.
Ыам ыйын 21 күнүгэр «Главстрой» муниципальнай хааһына тэрилтэтэ Үөрэх управлениетын кытта бырайыактыыр уонна тутар-таҥар үлэлэри суоттаабыттарынан, 61 мөлүйүөн солкуобайтан ордук тахсар. 
Киин куорат Тутууга уонна тырааныспарга департаменын информациятынан, тэрээһин былааныгар уларыйыылар киирэннэр электроннай атыы (аһаҕас күрэх) ыытыллыахтаах. 
«Хантараакка илии баттаһыы 2021 сыл от ыйын 23 күнүгэр буолуоҕа. Дьиэ үлэҕэ киириитэ сэтинньи 30 күнүгэр диэри былааннанар. Бырайыактыыр-сметалыыр докумуон оҥоһуллуута уонна тутар-таҥар үлэлэр тэҥҥэ барыахтара», – диэн иһитиннэрдэ тустаах департамент.
РФ үөрэҕириитэ цифровой үөрэхтээһин федеральнай ситимин кэҥэтэн, 55 региоҥҥа «IT-куб» кииннэри арыйар былааннаах.