Киин куоракка Эрмитаж күннэрэ ыытыллыахтара

Судаарыстыбаннай Эрмитаж – Арассыыйа уонна аан дойду бөдөҥ музейдарыттан биирдэстэрэ. «Эрмитаж күннэрэ» бырайыак чэрчитинэн, өрөспүүбүлүкэ олохтоохторугар уонна ыалдьыттарыгар анаан араас култуурунай-сырдатар тэрээһиннэр, ол иһигэр «Чаһы уонна кэрдиис кэм» быыстапка, эрмитажнай лекторий, дьүһүннүүр худуоһунньук маастар-кылаастара ыытыллыахтара. Оҕолор «Прогулка по экспозиции с котом Эрмиком!» бырагыраамаҕа кыттыахтарын сөп.

Сүрүн тэрээһининэн Судаарыстыбаннай Эрмитаж «Чаһы уонна кэрдиис кэм» быыстапката буолуоҕа, манна Арассыыйа историятын кэрдиис кэмнэрин, XVIII-с үйэ научнай уонна култуурунай саҕалааһыннарын сырдатар искусство оҥоһуктарын дьиҥнээҕэ баар буолуоҕа. Быыстапка тутаах экспоната – сир глобуһун курдук быһыылаан оҥоһуллубут сферическэй «күн чаһыта». Ити чаһы маастар Исаак Брукнер салалтатынан оҥоһуллубута.

Алтынньы 25 күнүттэн 28 күнүгэр диэри экспозицияҕа vr-киинэ тыйаатыра үлэлиэҕэ: ыалдьыттары «Зал Юпитера» виртуальнай шлем, «Галерея истории древней живописи» уонна Константин Хабенскайдыын «Эрмитаж: Погружение в историю» виртуальнай дьаарбайыы күүтэр.