Киин куоракка байыаннай сулууспаҕа ыҥырыы хампаанньата түмүктэннэ

Куорат уокуругар муус устар 1 күнүттэн саҕаламмыт гражданнары байыаннай сулууспаҕа ыҥырыы тэрээһиннэрэ түмүктэннилэр. 
Дьокуускай куорат байыаннай комиссара Афанасий Захаров иһитиннэриитинэн, байыаннай комиссариат уонна медицинскэй үлэһиттэр байыаннай сулууспаҕа ыҥырыы хампаанньатын үһүс төгүлүн коронавирус дьаҥынан хааччахтаах кэмҥэ ыыппыттар. 
«Хамыыһыйа биир кэлим үлэтин түмүгүнэн, өрөспүүбүлүкэ байыаннай комиссариата туруорбут былаана толорулунна. Хампаанньа кэмигэр коронавирус дьаҥын түбэлтэтэ тахсыбата. Хамыыһыйаны 3635 ыччат ааста, кинилэртэн 700 киһи сулууспалыы барда», - диир байыаннай комиссар.
Саха сириттэн ыҥырыллан барбыт уолаттар Илиҥҥи байыаннай уокурук территориятыгар баар байыаннай чаастарга тарҕатыллыбыттар. Ол иһигэр мотострелковай, воздушно-десантнай, тимир суол, ону сэргэ байыаннай-муора флотун уонна байыаннай-космос күүстэрин чаастарыгар. Бары чаастарга суоппар идэлээхтэр ирдэнэллэрэ бэлиэтэнэр. Уһук Илиҥҥи уокурукка Саха сирэ үрдүк үөрэхтээх ыҥырыллааччылары ыытарынан инники кэккэҕэ сылдьара этилиннэ. 
Байыаннай сулууспаҕа ыҥырыы хампаанньатын кэмигэр коронавирус дьаҥыттан көмүскэнэр ирдэбиллэр бары тутуһуллубуттар.