Киин куоракка 60 саастарыттан үөһэ дьон быһыыны ылааһына намыһах
Сэтинньи 29 күнүнээҕи Дьокуускай Суһал штабын мунньаҕар куорат территориятыгар коронавирус дьаҥын утары быһыыны ылыыга ураты болҕомто уурулунна.
Роспотребнадзор Саха сиринээҕи Управлениетын санитарнай кэтээн көрүүгэ, лицензиялааһыҥҥа уонна регистрацияҕа салаатын начаалынньыгын солбуйааччы Георгий Игнатьев бэлиэтээбитинэн, куорат уокуругун территориятыгар 60 саастарыттан үөһэ дьон быһыыны ылааһынын таһыма намыһах.
Дьокуускайга 60 саастарыттан үөһэ 30 тыһыынчаттан тахса киһи олорор. Социальнай харалта уонна үлэ Управлениетын салайааччыта Семен Матвеев иһитиннэрбитинэн, саастаах дьону кытта быһыыны оҥорор үлэни Саха сирин доруобуйа харыстабылыгар Министиэристибэтэ өрөспүүбүлүкэтээҕи социальнай көрүү-истии киинин кытта толорор.
Киин куорат Суһал штаба салалта территориальнай уорганнарыгар медицинскэй тэрилтэлэртэн быһыынан хабыллыахтаах 60 саастарыттан үөһэ дьон испииһэгин көрдүөххэ уонна тэтимирдэр курдук телефонунан тириэрдиэххэ диэн этиини киллэрбит.
Санатан эттэххэ, Дьокуускайга 60 саастарыттан үөһэ дьону кэрийэн быһыы оҥороллор, мобильнай пууннар үлэлииллэр. Итини сэргэ поликлиникаҕа кэлэн ылыахха сөп. Быһыы оҥорор пууннар толору испииһэктэрэ олохтоох дьаһалта саайтыгар yakutskcity.ru. баар.
Сонуннар
Ордук ааҕаллар
