Киин куоракка 156 араас омук бэрэстэбиитэлэ олорор

Тохсунньу 24 күнүгэр куорат баһылыга национальнай общиналар уонна Саха сирин норуоттарын ассамблеятын бэрэстэбиитэллэрин иннигэр отчуоттаата.
Дьокуускай куоракка, баһылык Евгений Григорьев бэлиэтээбитинэн, 156 араас омук бэрэстэбиитэлэ олорор, 49 национальнай-култуурунай холбоһук уонна 30-тан тахса религиознай тэрилтэ баар. 2022 сылга биллэриллибит Арассыыйа норуоттарын култуурунай нэһилиэстибэтин сылыгар Дьокуускай куоракка ыытыллыбыт үлэ туһунан иһитиннэрии кэнниттэн баһылык 2023 сылга кэммиэрсийэтэ суох тэрилтэлэргэ култуура, патриотизм хайысхаларыгар бырайыактары олоххо киллэрэргэ грант уонна субсидия быһыытынан өйөбүллэр баалларын бэлиэтээтэ, наркотигы, арыгыны утары бииргэ үлэлэһии көдьүүстээҕин иһитиннэрдэ. 
Уопсастыбаннай тэрилтэлэр, национальнай общиналар бэрэстэбиитэллэрэ куорат баһылыгыттан Ленин проспегын өрөмүөнүн, Промышленнай уокурукка Речниктар уулуссаларын тутуутун, социальнай гаастааһыны ыйыталастылар, куорат таһынааҕы нэһилиэктэргэ уулуссалары сырдатыы, тупсарыы боппуруостарын туруордулар. Арыгы атыытын хаачччахтааһыҥҥа сөптөөх үлэ баран эрэрин, уопсастыбаннай тырааныспар үлэтэ тупсубутун бэлиэтээтилэр. Маны сэргэ «Сабантуй» национальнай бырааһынньык боппуруоһун таарыйдылар.