Киин баан үрүҥ көмүс манньыат таһаарда

Олунньу 1 күнүттэн үс солкуобайдаах өйдөбүнньүк үрүҥ көмүс манньыат таҕыста, харчы “Саха АССР тэриллибитэ 100 сылыгар” ананар диэн Арассыыйа баанын пресс-сулууспата иһитиннэрэр. 
Манньыат ахсаана үс тыһыынча устуука. Күндү тимир ыраас ыйааһына – 31,1 г, уулларыллыбыт боруобата – 925, манньыат 39,0 мм диаметр эргимтэлээх.
Манньыат кэтэх өттүгэр олоҥхо мифологическай дьоруойдара ойууламмыттар – Ньургун Боотур уонна Туйаарыма Куо.
“Фигуралар лазернай тиэхиньикэнэн рельеф быһыытынан ойууламмыттар, кэннилэригэр Өлүөнэ остуолбалара көстөллөр. Үөһээ өттүгэр Саха Өрөспүүбүлүкэтин гербэтэ уонна көтө сылдьар кыталыктар күлүктэрэ баар. Суруктаахтар: үөһэ иилии – “Республика Саха (Якутия)”, аллара – национальнай орнамент фонугар – “100 лет”, - диэн иһитиннэриигэ суруллар.
Дизайн макетын АГИКИ үлэһиттэрэ оҥорбуттар, ону “Гознак” худуоһунньуктара Арассыыйа баанын өйдөбүнньүк манньыаттарын ирдэбилинэн ситэрэн биэрбиттэр.
Санатар буоллахха, өйдөбүнньүк манньыаты таһаарыы үлэтэ 2018 сылтан саҕаламмыта.