Кэскиллээх сөбүлэҥ баттанна

Дьокуускай куораттааҕы Дуума уонна куорат баһылыгын иһинэн үлэлиир предпринимательствоны Координациялыыр сэбиэт бииргэ үлэлээһин туһунан сөбүлэҥҥэ илии баттаатылар. Бу туһунан Олохтоох дьаһалта пресс-сулууспата иһитиннэрдэ.
Бииргэ үлэлээһин туһунан сөбүлэҥҥэ предпринимательствоны Координациялыыр сэбиэт хос бэрэссэдээтэлэ Олег Маклашов уонна Дьокуускай куораттааҕы Дуума Бэрэссэдээтэлэ Альберт Семенов илии баттаатылар. 
Альберт Семенов бэлиэтээбитинэн, бииргэ үлэлээһин чэрчитинэн Арассыыйа утары санкциялар кэмнэригэр Дьокуускай куорат предпринимателлэрин өйүүр эбии миэрэлэр киирэллэр. Манна даҕатан дойду, өрөспүүбүлүкэ Бырабыыталыстыбаларын уонна куорат салалтатын  өттүттэн оҥоһуллар өйөбүл туһунан тоһоҕолоон этилиннэ. 
«Предпринимателлэргэ олох саҥа ирдэбиллэрэ сонун буолбатахтар дии саныыбын, кинилэр урут манна майгынныыр уустуктары көрсөллөр этэ. Ол эрэн, өрөспүүбүлүкэбит киин куоратын территориятыгар суолталаах бырайыактары олоххо киллэриигэ бииргэ сомоҕолоһуохтаахпыт», - диэтэ Альберт Семенов. 
Олег Маклашов бэлиэтээбитинэн, бииргэ үлэлээһин сыала – туһалаах уонна таһаарыылаах үлэ, ол иһигэр предпринимателлэр үлэлэрин судургутутар нормативнай-быраап аакталырын оҥорууга. 
«Сөбүлэҥи баттаан биһиги бизнес эйгэтэ, хас биирдии предприниматель бизнеһин туруга тупсарыгар дьулуһабыт», - диэтэ Олег Маклашов.
Дьокуускай куораттааҕы Дуума Бэрэссэдээтэлин солбуйааччы Евдокия Евсикова докумуон олоҕурбут бииргэ үлэлээһини бөҕөргөппүтүн, ону таһынан Дьокуускай предпринимателлэригэр куорат олоҕун араас хайысхатынан үлэлиир хамыыһыйаларга кыттар кыаҕы биэрбитин бэлиэтээтэ.  
«Ити предпринимателлэр үлэлиир эйгэлэрин эрэ кэҥэтээһин буолбатах, биллэн турар, куоракка туһаны аҕалыаҕа», - диэтэ Евдокия Евсикова.  
Бизнес эйгэтин бэрэстэбиитэллэрэ санкция усулуобуйатыгар предпринимателлэри өйүүр наадалааҕын туһунан эттилэр.