«Кэрэ кэпсээн» биэриини көрүҥ

Быйылгы сыл уратытынан САССР тэриллибитэ 100 сыла, Арассыыйаҕа Норуоттар култуураларын нэһилиэстибэтин сыла, СӨ Ийэ сыла биллэриллибитэ буолар. 
Хатастар, дьолбутугар, уруккуну билиҥҥилиин ситимнээн, төрүт үгэстэрбитин бүгүҥҥүлүүн алтыһыннаран үүнэр-сайдар аартыкка сирдиир үтүөкэн дьонноохпут. Ол да сиэринэн иис-күүс, уус да өттүнэн, төрүт дорҕоон, тыыннаах доҕуһуол, муусука, ускуустуба да өттүнэн тутахсыйбатах нэһилиэкпит. 
Бу, биллэн туран, нэһилиэкпит салайааччылара (бу түгэҥҥэ сыһыаран эттэххэ П.П. Федорова, С.К. Окороков, Л.М. Чепалова) оччоттон баччааҥҥа диэри култуура эйгэтин күннээҕи олохтуун ыкса ситимнээн кэлбиттэриттэн буолар. 
Бу күннэргэ оннук дьонтон биирдэстэрэ – култуура эйгэтигэр үлэлээбитэ 55 сыл ыстаастаах А.С. Титова туһунан “Саха” НКИХ “Кэрэ кэпсээн” биэриитигэр сэһэргээн кэллибит. Ылсыбытын ыһыктыбат, туппутун туллаҥнаппат, айымньылаах үлэттэн астыныыны ылбыт, түбүктээх үлэттэн үрдүк үктэллэри дабайбыт Анна Титовна Семёнова ыра санаа ыллыгынан киэҥ аартыкка тахсыбыт олоҕун сырдатыыга кэллиэгэлэрэ, үөрэппит оҕолоро (бүгүн бэйэлэрэ төрөппүттэр), Хатастааҕы оҕо ускуустубатын оскуолатын, «Тускул” КК салайааччылара, С. Зверев-Кыыл уола аатынан үҥкүү тыйаатырын саха үнүстүрүмүөннэрин оркестрын муусукаана, ''Кыл саха'' төрүт дорҕоон бөлөҕүн салайааччыта сырдаттылар. Кини бу ситиһиитин кистэлэҥэ дьону-сэргэни кытта алтыһыыга, кэлэктиип үлэтин тэтимигэр сөп түбэһиннэрэн кимиилээх, сыаллаах-соруктаах, инникигэ эрэллээх үлэтигэр сытарын бэлиэтээтилэр.
«Саха” НКИХ чахчы да сүҥкэн суолталаах үлэни-хамнаһы ыыта сылдьарыгар махтанабыт. Махтанабыт биэрии ааптарыгар, ыытааччы Елена Петровна Керемясоваҕа. 
Күндү биир дойдулаахтарбытын олунньу 19 күнүгэр күнүс 12 ч. 15 мүн. “Кэрэ кэпсээн” биэриини көрөргүтүгэр ыҥырабыт. Бу туһунан “Киин куорат” хаһыакка анаан Н.И. Руфова иһитиннэрэр.