Кангалаастар бөһүөлэги кытта ситимнээх былааны үөрэ иһиттилэр

2022 сыллаахха Кангалаас бөһүөлэгэр Нагорнай уулусса саҥардан оҥоһуллубут, суол өрөмүөнэ 2023 сылга салҕанан, Ольховая уулуссаҕа хапытаалынай өрөмүөн күүтүллэр. Маны сэргэ муоста тутуута уонна Севернай уулуссаны сырдатыы күүтэр. 2022 сылга бөһүөлэккэ спорт балаһаакката тутуллубут буоллаҕына, быйыл Комсомольскай уул., 10 тиэргэнин тупсаран оҥоруу былааннанар. Нэһилиэнньэ хаарбах дьиэттэн көһөрүү бырагырааматыгар хабыллан, икки хаарбах кыбартыыраттан 6 киһи саҥа дьиэҕэ көспүт. 2023 сылга 7 хаарбах кыбартыыраттан 20 киһи саҥа дьиэлэнээри олорор. Куорат дьаһалтата маныаха ордук сытыытык наадыйааччыларга маневреннай пуондаттан олорор сири биэрии боппуруоһун толкуйдуур буолла.
Мунньах чэрчитинэн олохтоохтор хас да сыллааҕыта элбэх кыбартыыралаах олорор дьиэлэр хапытаалынай өрөмүөннэрин бырагырааматынан оҥоһуллубут өрөмүөн хаачыстыбата мөлтөҕүн, ол иһигэр КПД дьиэлэр сииктэрэ куһаҕаннык оҥоһуллан, кыбартыыралар тымныыларын бэлиэтээтилэр. Элбэх үҥсүү бөһүөлэги итиинэн хааччыйар «Пригородная теплосетевая компания» МУТ аатыгар киирдэ. Тэрилтэ бэрэстэбиитэлэ хоруйдаабытынан, дьиэлэргэ итии нуорманы таһынан ыытыллар, оттон кыбартыыралар сылыйбаттарын биричиинэтэ – дьиэ истиэнэтин бүрүөһүнэ мөлтөҕө эбэтэр дьиэ иһинээҕи ититэр систиэмэ хаачыстыбата суоҕа. Маны кытта олохтоохтор ититиигэ уонунан мөлүйүөн иэстээх олороллоро этилиннэ.
Кангалааска «Сбербаан» банкомата суоҕа, 104 №-дээх оптуобус маршрута кылгаһа элбэх кыһалҕаны үөскэтэрэ билиннэ. 
Кангалаас – куорат биир сытыы, уонунан сылларга мунньуллубут  кыһалҕалаах оройуона, онон нэһилиэнньэ Евгений Григорьев саҥа хочуолунайы, элбэх функциялаах култуура киинин о.д.а. тутар былаан баарын этиитин үөрэ иһиттилэр.