Кадеттар оскуолаларын бастакы сыбаайата түстэ

СӨ Баһылыгын уонна бырабыыталыстыбатын пресс-сулууспата иһитиннэрбитинэн, итини сэргэ саҥа куорпуска «Авангард» ыччаты байыаннай патриотическай иитии киинэ үлэлиэҕэ. 

Бырабыыталыстыба бэрэссэдээтэлэ Андрей Тарасенко бэлиэтээбитинэн, Дьокуускайдааҕы кадетскай интэринээт-оскуола 2000 сылга тэриллибит уонна 22 сыл тухары саҥардыллыбатах.

«Бу наһаа күүтүүлээх түгэн уонна наадалаах эбийиэк. Оҕолор эргэрбит дьиэҕэ үөрэнэллэр, дьиҥнээх «армейскай» усулуобуйаҕа олороллор. Билигин федеральнай киин өйөбүлүнэн үөрэх инфраструктуратын саҥардыахпыт. Кэлэр сылга курсааннар уонна педагогтар саҥа 200 миэстэлээх үөрэтэр куорпустаныахтара уонна 125 миэстэлээх интэринээттэниэхтэрэ. Аныгылыы дьиэҕэ сүрүн предметтэри сэргэ байыаннай дьыала төрүтүн үөрэтиэхтэрэ», – диэтэ Андрей Тарасенко.

Үс этээстээх, 6 тыһ. кв. м. тахса иэннээх оскуола саҥа дьиэтэ икки блоктаах буолар.

Үөрэнэр блокка кэбиниэттэр, лабораториялар, лингафоннай кылаастар, ааҕар саалалаах библиотека, 120 миэстэлээх актовай саала, спордунан дьарыктанар, эбиэттиир саалалар, холл, учительскай, маһынан уонна тимиринэн уһанар мастарыскыайдар, автодело, итиэннэ профильнай бэлэмнэнии кылаастара уо.д.а. былааннаналлар.

Иккис блокка туспа киирэр ааннаах интэринээт буолар, манна 4-5 миэстэлээх утуйар хостор, медкэбиниэттэр, куруһуок, сынньалаҥ хосторо, душевой, прачечнай уо.д.а. баар буолуохтара.

Тутуу бэдэрээтчитэ – «ТСК+» ХЭТ.