Күүстээх аҥаардарбытын күндүлүүбүт

Оҕуруот аһын кытта соркуойдаммыт куурусса

Састааба:

Куурусса түөһэ (филе) – 500 г;

Мас арыыта – 2 ост. ньуоска;

Эриэппэ луук – 1 орто кээмэйдээх;

Чочунаах – 4 өлүүскэ;

Минньигэс биэрэс – 1-2 устуука;

Бальзамическай уксуус (виннай) – 1-2 ост. ньуоска;

Соевай соус – 2-3 ост. ньуоска;

Саахар – 1 ост. ньуоска.

Кууруссабыт түөһүн уһун-синньигэс гына эбэтэр куубуктуу кырбастыыбыт. Минньигэс биэрэһи соломолуу быһабыт, биэрэс суох буоллаҕына, 1 моркуобу түөркэлиэххэ сөп.

Хобордоохпутугар 1 ост. ньуоска мас арыытыгар кууруссабыт түөһүн саһархай өҥнөнүөр диэри соркуойдуу түһэбит, хостуубут. Итиннэ эбии өссө 1 ост. ньуоска мас арыытын эбэбит уонна кырбастаммыт луукпутун, чочунаахпытын сырдьыгынатан ылабыт, онтон соломолуу быспыт биэрэспитин эбэтэр түөркэлэммит моркуоппутун кутан, биир-икки мүнүүтэ буһарабыт. Салгыы бальзамическай уксуус (виннай) уонна саахар эбэбит, мүнүүтэ курдук булкуйа-булкуйа буһара түһэбит. Ити кэнниттэн кууруссабыт түөһүн төттөрү хобордооххо угабыт, хаппахтыыбыт уонна мөлтөх уокка 20 мүнүүтэ буһарабыт.

Сыырдаах уонна эттээх рулет

Састааба:

Кытаанах сыыр – 200 г;

Сымыыт – 3 устуука;

 Мааннай куруппа – 3 ост. ньуоска;

Майонез – 100-150 г.

Начыына:

Эриллибит эт – 500 г;

Сымыыт – 2 устуука;

Эриэппэ луук – 1 устуука;

Туус, биэрэс.

Сыырбытын бөдөҥ гына түөркэлиибит, сымыыты, мааннай куруппаны уонна майонеһы кытта булкуйабыт. Духуопка лииһигэр тэнитэ уурабыт уонна 180С кыраадыс итиигэ 20 мүнүүтэ буһарабыт.

Бу кэмҥэ начыынын бэлэмниибит: эриллибит эккэ эриэппэ луугу, 2 сымыыты, тууһу-туманы эбэн булкуйабыт. 20 мүнүүтэнэн сыырдаах аспытын хостоон кыратык сойута түһэбит, онтон үрдүгэр начыыммытын тэнитэн уурабыт. Сэрэнэн рулет гынан суулуубут. Эмиэ 180С кыраадыстаах духуопкаҕа 40 мүнүүтэҕэ уган буһарабыт.

Кууруссалаах салаат

Састааба:

Куурусса түөһэ – 400 г;

Черри помидор – 250 г;

Сыыр – 200 г;

Шампиньон – 250 г;

Майонез, туус.

Куурусса түөһүн ууга буһарабыт, сойутабыт. Шампиньоннары сууйабыт, кыра соҕус гына кырбастыыбыт, кыратык мас арыылаан соркуойдуу түһэбит, сойутабыт.

Кууруссабыт түөһүн кыра соҕус гына, сыырбытын куубуктуу, помидордарбытын чиэппэрдии бысталыыбыт. Барытын салаат оҥорор миискэбитигэр кутабыт. Майонезтыыбыт, туустуубут, булкуйабыт.

Сымнаҕас баахыла

Састааба:

Үүт – 250 мл;

Сымыыт – 2 устуука;

Саахар – 40 г;

Бурдук – 180 г;

Суода – ч. ньуоска ¼;

Быһах угугар лимон кислотата;

Туус.

Үүккэ сымыыты, саахары уонна атын бородуукталарбытын кутан булкуйабыт, 10-15 мүнүүтэ туруора түһэн баран, пуормаҕа буһарабыт.

Хачыгырас баахыла

Тотоойу астарбытын бэлэмнээтибит, аны минньигэскэ киирэбит.

Састааба:

Арыы – 250 г;

Саахар – 350 г;

Сымыыт – 5-6 устуука;

Ванильнай саахар – 1 бакыат;

Хортуоппуй крахмала – 500 г;

Туус.

Арыыны уулларан, мэлии саахары эбэн, ууллуор диэри булкуйан баран, 5-6 сымыыты, крахмалы эбэбит, кыратык туустуубут. 15 мүнүүтэ туруора түһэн баран пуормаҕа кутан буһарабыт.

«Минутка» торт (микроволновка ырысыаба)

Састааба:

Сымыыт – 1 устуука;

Үүт – 5 ост. ньуоска;

Мас арыыта – 3 ост. ньуоска;

Какао-бороһуок – 2 ост. ньуоска;

Саахар – 4 ост. ньуоска;

Бурдук – 3 ост. ньуоска;

Крахмал – 1 ост. ньуоска;

Суода – 1 ост. ньуоска.

Бастаан саахары кытта сымыыты үллүөр диэри ытыйабыт, онтон какао-бороһуогу эбэбит, сэрэнэн булкуйабыт. Салгыы бурдугу, крахмалы, суоданы кутан булкуйабыт, онтон үүппүтүн уонна мас арыыбытын эбэбит. Үчүгэйдик булкуйан баран арыынан сотуллубут пуормаҕа кутабыт уонна микроволновкаҕа буһара туруорабыт. Оһохпут кыамтата 1000 буоллаҕына, 3 мүнүүтэ буһарабыт, 800 буоллаҕына – 3,5 мүнүүтэ. Буспут бискибиити икки гына аҥаардыыбыт. Кириэми ким хайдах сөбүлүүрүнэн оҥоруон сөп. Холобур, сүөгэйи саахардаан ытыйабыт, отонунан эбэтэр клубниканан киэргэтэбит.

Бырааһынньыктааҕы сандалыбыт сүрүн аһа бэлэм. Минньигэстиҥ аһааҥ!