Көҕөрдүү стратегията оҥоһуллар

Дьокуускай куорат баһылыга Евгений Григорьев соруйуутунан   көҕөрдүү үлэтин биэс сыллаах стратегията оҥоһуллуохтаах. Бу туһунан анал бөлөх мунньаҕа буолан ааста.

“Тротуардары кыйа туруоруллубут тимир күрүөлэри көтүрүөхпүтүн баҕарабыт”, – диэтэ баһылык солбуйааччыта Роман Сорокин. Кини М.К. Аммосов аатынан Ботаническай саад дириэктэрэ Наталья Аммосоваҕа биһиги кыһыммытын тулуйар,  тыйыс усулуобуйабытыгар сөптөөх үүнээйилэр испииһэктэрин оҥорон биэрэллэригэр көрдөстө.

Куорат хаһаайыстыбатын үлэлэтэр сулууспа салайааччыта Айаал Егинов иһитиннэрбитинэн, куорат баһылыгын дьаһалынан көҕөрдүү үлэтин ыытар штаб тэрилиннэ. Онно олохтоох салайыныы уорганнарын бэрэстэбиитэллэрэ, М.К. Аммосов аатынан Хотугулуу-Илиҥҥи федеральнай университет, Арктикатааҕы судаарыстыбаннай агротехнологическай университет, “Якутдорстрой” АУо, Дьокуускай куорат социальнай тэрилтэлэрэ киирдилэр.

“Куорат уопсастыбаннай сирдэрин көҕөрдүүгэ уонна хааччыйыыга былаан оҥоһулунна. Быйылгы сылга 71 672 сибэккини үүннэрэргэ 5 мөлүйүөнтэн тахса солкуобай үп көрүлүннэ. 1284 маһы олордууга 2 мөлүйүөн 855 тыһыынча солкуобай харчы тыырылынна”, – диэтэ Айаал Егинов.

Дьокуускай куорат сүрүн архитектора Семен Сергеев олохтоох салайыныы уорганнарын салайааччыларыгар «LETO» киин сүбэлэринэн сирдэтинэллэригэр, архитектурнай концепцияны тутуһалларыгар эттэ.  

Арктикатааҕы судаарыстыбаннай агротехнологическай университет ректорын эбээһинэһин толорооччу Константин Кривошапкин үөрэх кыһата куоракка 100 тыһыынча сибэккини үүннэрэр былааннааҕын кэпсээтэ. Ону таһынан мастары, үүнээйилэри олордорго бэлэмниир анал питомник тэриллэригэр этии киллэрдэ.  

Баһылык бастакы солбуйааччыта Роман Сорокин олохтоох салайыныы уорганын салайааччыларыгар уонна Куорат хаһаайыстыбатын үлэлэтэр сулууспаҕа университет этиитин олоххо киллэрэр суоллары тобулалларыгар соруйда. Ону таһынан Куорат хаһаайыстыбатын үлэлэтэр сулууспа 10 күн иһигэр аукцион биллэрэргэ докумуоннары бэлэмнээн бүтэрэригэр дьаһайда.