Көрүүтэ-истиитэ суох кыылларга эбии вольердар тутуллуохтара

Киин куорат салалтата «Помоги выжить» аһымал пуондаҕа  көмө оҥоруоҕа. Бу туһунан куорат баһылыгын э.т. Евгений Григорьев бэйдиэ сылдьар кыыллары быстах кэмҥэ тутар Пуун дириэктэрэ, пуонда салайааччыта Екатерина Безрученконы кытта көрсүһүүтүгэр эттэ.

Кулун тутар 1 күнүнээҕи туругунан, манна 209 көрүүтэ-истиитэ суох ыт баар, федеральнай сокуоҥҥа олоҕуран, бу нэдиэлэҕэ 142 кыыл көҥүлгэ ыытыллыахтаах.

«Кыыллар олорор усулуобуйаларын тупсарар туһугар Пууну кытта үлэбитин күүһүрдэр санаалаахпыт. Бастатан туран, элбэх ыты батарарга эбии вольердар тутуллуохтара. Бэйдиэ сылдьар кыыллары тутар анал массыыналары ылыахпыт», — диэтэ куорат баһылыгын э.т.

Евгений Григорьев кыылларын босхо ыытан кэбиһэр дьоҥҥо ыстараап санкциятын кытаатыннарар оруннааҕын бэлиэтээтэ. Бу «Кыылларга эппиэтинэстээх сыһыан туһунан» федеральнай сокуоҥҥа уларыйыы киириэр диэри  ыттар дьоҥҥо саба түһүүлэрин аччатар туһуттан оҥоһуллуохтааҕын эттэ. Маныаха кыыл хаһаайынын быһаарар, регистрациялыыр, быһыыны, чип туруорар үлэ бэрээдэктэниэхтээх.   

Екатерина Безрученко эппитинэн, пуунтан кырыктаах ыттары көҥүлгэ ыыппаттар. «Статистика көрдөрөрүнэн, дьоҥҥо хаһаайыннаах ыттар саба түһэллэр», – диэтэ.

Ыттарга аһылык, вакцина тиийэр. Билигин кинилэргэ «Мультикан-8» диэн комплекснай быһыы туруоруллар.

Олохтоох дьаһалта бэйдиэ сылдьар кыыллары быстах кэмҥэ тутар Пууҥҥа ыттары стерилизациялыыр матырыйааллары атыылаһарыгар көмөлөһүөҕэ. Маны таһынан,  Евгений Григорьев инстаграмҥа суруйбутунан, билигин сөптөөх приют тэриллэригэр миэстэ көрдүүллэр. 

Пуун иһитиннэрэринэн, Дьокуускай куоракка 2020 сылга 2322 бэйдиэ сылдьар кыыл тутуллубут, 1172-тэ стерилизацияламмыт уонна аттаммыт, 1056-та быһыы ылбыт, 628-һа хаһаайыныгар төннүбүт уонна атын дьоҥҥо иитиигэ бэриллибит, 788 көҥүлгэ ыытыллыбыт.