Көһөрүү үлэтэ салҕанар

Олохтоох дьаһалта пресс-сулууспата иһитиннэрэринэн, Дьокуускай куоракка Строительнай уокурук (2а, 2б, 2г, 4а, 4б, 4в, 17 кыбаарталлар) хаарбах туруктаах дьиэлэриттэн олохтоохтору көһөрүү салҕанар.

«Дьиэ-уот сыһыаннаһыыларын департамена» муниципальнай хааһына тэрилтэтэ иһитиннэрбитинэн, бастакы уочаратынан биэс аадырыстан  – Жорницкай уул., 40, 42, Пионерскай уул., 8/2, Якутскай уул., 12, 14 олохтоохтору көһөрүү былааннанар. Бу дьиэлэр оннуларыгар социальнай суолталаах эбийиэктэр – уһуйаан уонна спорт комплекса тутуллуохтаахтар. Ити ыйыллыбыт биэс элбэх кыбартыыралаах дьиэттэн олохтоохтору көһөрүүгэ туһааннаах тэрээһиннэри ыытыыга эппиэтинэстээх сирэйинэн Дьокуускай куорат Олохтоох дьаһалтата ананна.

Билиҥҥи туругунан Олохтоох дьаһалтаҕа Жорницкай уул., 40, 42, Пионерскай уул., 8/2 турар элбэх кыбартыыралаах дьиэлэртэн олохтоохтору көһөрүүгэ диэн өрөспүүбүлүкэ судаарыстыбаннай бүддьүөтүттэн тыырыллыбыт үп лимиитэ 36 дьиэ кэргэн саҥа дьиэ ылынарыгар кыах биэриэҕэ. Саҥа дьиэ-уот күлүүстэрин туттарыы уонна харчынан компенсацияны талбыт дьоҥҥо ону төлүүр үлэ ыытыллар.

Якутскай уул., 12 уонна 14 нүөмэрдээх дьиэлэрин ирдэнэр докумуоннары туттарбатах бас билээччилэрэ уонна куортамнааччылара! Эһигини Дьиэ-уот сыһыаннаһыыларын департаменын көһөрүү салаатыгар биллэргитигэр көрдөһөллөр. Аадырыһа: Дьокуускай куорат, Дзержинскэй уул., 21, 8-с кэбиниэт. Гражданнары кытта үлэ сарсыарда 9.00 чаастан күнүс 12.00 чааска диэри ыытыллар. Билсэр төл. 22-60-48.

«2023-2027 сылларга «Дьокуускай куорат» куораттааҕы уокурук нэһилиэнньэтин дьиэнэн-уотунан хааччыйыы» муниципальнай бырагыраама аннынан киирэр «Дьокуускай куорат» куораттааҕы уокурук хаарбах туруктаах дьиэ-уот пуондатыттан олохтоохтору көһөрүү» муниципальнай бырагыраама иитинэн үс хаарбах туруктаах элбэх кыбартыыралаах дьиэ (Пионерскай уул., 13, Жорницкай уул., 19, Жорницкай уул., 21) көтүрүллэн, олохтоохторо көһөрүллүбүтэ.

Маны сэргэ, «2023-2027 сылларга хаарбах туруктаах дьиэ-уот пуондатыттан олохтоохтору көһөрүү» өрөспүүбүлүкэтээҕи аадырыстаах бырагыраама иитинэн киин куорат Строительнай уокуругар турар (2а, 2б, 2г, 4а, 4б, 4в, 17 кыбаарталлар) 11 элбэх кыбартыыралаах дьиэ көһөрүллүбүтэ.

2023 сыллаахха олунньу 28 күнүгэр тахсыбыт  СӨ Бырабыыталыстыбатын «Саха Өрөспүүбүлүкэтин «Дьокуускай куорат» куораттааҕы уокуругун 2а, 2б, 2г, 4а, 4б, 4в, 17 кыбаарталларыгар дьиэ-уот тутуллар сирин-уотун биир кэлимник сайыннарыы туһунан» 149 №-дээх ыйааҕыгар олоҕуран, «Өрөспүүбүлүкэтээҕи ипотека агентствота» АУо  олохтоммут сокуон бэрээдэгинэн хаарбах туруктааҕынан уонна көтүрүллүөхтээҕинэн билиниллибэтэх 160 элбэх кыбартыыралаах дьиэни, ол иһигэр 6 элбэх кыбартыыралаах дьиэни, көһөрүөхтээх.  

Итини таһынан, 2020 сыллаахха алтынньы 2 күнүгэр «Агентство по развитию территорий» ХЭТ кытта түһэрсиллибит дуогабар чэрчитинэн 2 хаарбах туруктаах дьиэ көһөрүллүөҕэ. Болдьоҕо – 2025 сыл ахсынньы 31 күнүгэр диэри.

«Өрөспүүбүлүкэтээҕи ипотека агентствота» АУо «Спортивнай» дьоҕус түөлбэни биир кэлимник сайыннарыы чэрчитинэн биэс түһүмэхтээх үлэни былаанныыр, ол 2030 сылга түмүктэниэхтээх. Билигин бастакы түһүмэҕи олоххо киллэрии ыытыллар, онно 23 хаарбах туруктаах дьиэ, ол эбэтэр 366 кыбартыыра киирбит. Маны сэргэ Якутскай уул., 59, 61/1, 63 уонна 63/1, ону таһынан Пионерскай уул., 38/1 уонна 40/1 дьиэлэртэн олохтоохтору көһөрүү үлэтэ барар. Итиэннэ 2б кыбаарталга турар атын 17 дьиэ докумуона хомуллар.

Хаартыска: yakutskcity.ru саайтан