05.10.2022 | 17:42

Күндүтүк саныыбыт, өрүү махтанабыт!

Учуутал баар буолан, билии-көрүү, олох киэҥ аартыгын арыйабыт,  алыптаах эйгэҕэ, уустук ахсаан суотугар, төрөөбүт төрүт тыл умсулҕаныгар уһуйуллабыт. Бүгүҥҥү бырааһынньыктааҕы нүөмэрбитигэр өрөспүүбүлүкэҕэ биллэр-көстөр дьоммут учууталларыгар махтаннылар, оҕо саас ахтылҕаныгар куустардылар. 
Күндүтүк саныыбыт, өрүү махтанабыт!
Ааптар: Айталина Софронова

Юлия Осипова, Дьокуускай куорат уокуруктааҕы дьаһалтатын пресс-сулууспатын кылаабынай исписэлииһэ:

— Биhиги маҥнайгы учууталбыт Марианна Эдуардовна Моисеева суруйарга, суоттуурга, ааҕарга, доҕордоhорго, улахан дьоҥҥо ытыктабыллаахтык сыhыаннаhарга, айылҕаны, тулалыыр эйгэни харыстыырга үөрэппитэ. Оскуолаҕа, нэhилиэккэ, улууска ыытыллар бары күрэхтэргэ кылааһынан ситиhиилээхтик кыттарбыт. Ол курдук учууталбыт хас биирдии оҕо дьоҕурун кэтээн көрөн арыйа сатыыра, куруук көмөлөһөрө. Хайҕыыр кэмҥэ хайҕаан, мөҕөр кэмҥэ мөҕөн, чиэhинэй буоларга үөрэппитэ.

Түгэнинэн туhанан, Марианна Эдуардовнаны Учуутал күнүнэн итиитик-истиҥник эҕэрдэлиибин! Ону таhынан Горнай улууhун Бэрдьигэстээх оскуолаларын учууталларыгар, кыра эрдэхпиттэн үөрэ-көтө дьарыктаммыт "Аргыс" оҕо устуудьуйатын салайааччыларыгар улахан эҕэрдэбин уонна махталбын тиэрдэбин. Үчүгэй истигэн үөрэнээччилэри, өйдүүр-өйүүр төрөппүттэри баҕарабын.

Александр Бурнашов, СӨ норуодунай артыыһа, Мэҥэ Хаҥалас улууһун бочуоттаах олохтооҕо:

— Киэҥ аартыкка сирдээбит, үөрэх сырдыгын иҥэрбит, оскуола боруогар аан бастаан сиэтэн киллэрбит тапталлаах учууталым Дарья Иннокентьевна Маркованы Учуутал күнүнэн истиҥник эҕэрдэлиибин. Кини – «Учууталлар учууталлара”, Мэҥэ Хаҥалас Табаҕа орто оскуолатыгар музыка учууталынан өр сылларга үлэлээбитэ.

Учууталым барахсан оҕо уһуйааныттан саҕалаан оскуола алын кылаастарын бүтэриэхпэр диэри атын оҕолортон чорботон туран үөрэппитэ.

 

Нюргуяна Сыроватская – Нюргуша, ыытааччы, блогер:

— Учуутал күнүнэн маҥнайгы учууталым Любовь Егоровна Мушникованы истиҥник эҕэрдэлиибин, махталбын тиэрдэбин. Кини кытаанах, ирдэбиллээх, эппитин толорторор этэ. Ол иһин үлэҕэ, олоххо дьулуурдаах киһи буолбуппун  дии саныыбын. Любовь Егоровнаҕа доруобуйаны, табыллыыны баҕарабын.

Петр Черкашин, уопсастыбанньык, «Үтүө санаа долбуура» аахсыйа көҕүлээччитэ, «Чолбон»  бассейн дириэктэрэ:

— Мин 1994 сыллаахха Уус Алдан Тумул оскуолатыгар үөрэнэ киирбитим. Биһиги маҥнайгы учууталбыт Зоя Ивановна Габышева барыбытыгар ийэлии сыһыаннаһара, биир дьиэ кэргэн оҕолорун курдук эйэлээх этибит. Билигин да бииргэ тутуспутунан сылдьабыт, бэйэ-бэйэбитин өйөһөбүт. Учууталбыт бу күҥҥэ диэри көмүс сүбэлэринэн көрө-истэ, көмөлөһө сылдьар. Зоя Ивановна курдук учууталлаахпынан киэн туттабын!

 

Екатерина Хоютанова, Үүнэр көлүөнэ тыйаатырын артыыһа:

— Мин Мэҥэ Хаҥалас улууһун Бэдьимэ орто оскуолатын 2010 сыллаахха бүтэрбитим. Маҥнайгы учууталбыт Надежда Григорьевна Дмитриева биһигини ааҕарга, суруйарга, суоттуурга уһуйбута, үчүгэй үөрэхтээх, бэрээдэктээх, үлэһит дьон буоларбытыгар кыһаллара. Онтон 2-4 кылаастарга салгыы Екатерина Николаевна Попова үөрэппитэ. Кини миэхэ артыыс буоларбар бастакы олугу уурбута. Ол курдук оскуолаҕа, нэһилиэккэ, улууска, өрөспүүбүлүкэҕэ ыытыллар араас күрэхтэргэ, уус-уран ааҕыыларга кытыннарара, элбэхтик миэстэлэһэн үөрэрбит-көтөрбүт. Екатерина Николаевна хоһоону ааҕарга, артыыстыырга, оруолга киирэргэ чочуйбута. 

Маҥнайгы учууталларбар махталым муҥура суох.  Учуутал күнүнэн истиҥник эҕэрдэлиибин!

Ариян Свинобоев - Арыйаан, ырыаһыт, спортсмен:

— Мин 1996 сыллаахха Мэҥэ Хаҥалас улууһун Тумул орто оскуолатыгар киирбитим. Маҥнайгы учууталым Галина Егоровна Аргунова билигин даҕаны оскуолаҕа үлэлии сылдьар. Кинини кытта сибээспитин быспаппыт, куруук билсэ олоробут. Бу санаатахха, биһиги кылааспыт саамай түмсүүлээх, бэрээдэктээх этэ, күн бүгүҥҥэ диэри оннук эйэлээхпит.

Оҕо сааспын, оскуолаҕа үөрэммит сылларбын олус күндүтүк саныыбын. Таптыыр учууталбытыгар үөрэппит оҕолоруҥ ааттарыттан эҕэрдэбитин тиэрдэбин, доруобуйаны баҕарабын.

Юрий Гольдеров, ырыаһыт:

— Мин Үөһээ Бүлүү улууһун Өргүөт нэһилиэгин орто оскуолатын бүтэрбитим. Оскуолаҕа 2002 сыллаахха киирбитим, маҥнайгы учууталым Марина Петровна диэн этэ. Биһиги дьолбутугар, бииртэн биир үчүгэй учууталлар үөрэппиттэрэ, оҕоҕо сыһыаннара, билиини биэрэллэрэ ураты буолара.

Бу билигин киэҥ эйгэҕэ ыллыы-туойа сылдьарым барыта учуутал үтүөтэ дии саныыбын. Ол курдук миигин ырыаҕа уһуйбут Марианна Ивановна Иванованы чорботон ааттыахпын баҕарабын. Киниэхэ махталым муҥура суох, күн бүгүҥҥэ диэри сибээспин быспаппын, куруук сүбэ-ама буолар. 

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.