Күһүҥҥү киһи күлбүтүнэн!

Тууһаммыт хаппыыста

Эһиэхэ наада (быһа холоон):

хаппыыста – 2,5 киилэ;

моркуоп – 1 устуука;

туус – 2 ост. ньуоска;

саахар – 1 ост. ньуоска;

төгүрүк хара биэрэс –15 устуука;

уу – 800 мл.

Хаппыыстаны таһынааҕы сэбирдэхтэриттэн ыраастыыбыт. Аҕыйах чараас сэбирдэҕи хаалларабыт, атынын сытыы быһаҕынан чараас гына кырбыыбыт. Эмалированнай миискэҕэ уган, туустаан баран, сүмэһинэ тахсыар диэри илиинэн мэһийэбит. Манна теркаламмыт моркуобу эбэбит. Таас эбэтэр эмалированнай иһиккэ толору симэбит уонна үрдүгэр хаалбыт хаппыыста сэбирдэхтэрин уурталаан, ыйааһынынан баттатабыт. Дьиэ иһинээҕи температураҕа 2-3 күнүнэн аһыйан барар. Минньигэс буоларын курдук, укуруоп сиэмэтин эбэтэр дьаабылыканы кырбаан кутуохха сөп.

Маринадтаммыт хаппыыста

Эһиэхэ наада (быһа холоон):

3 киилэ хаппыыста;

4 моркуоп;

2 ост.ньуоска туус;

0,5 ыстакаан 9% -наах уксуус;

3 өлүү чеснок;

800 мл итии уу.

Рассол оҥорорго итии ууга бытарытыллыбыт чесногу, тууһу, саахары эбэн оргутабыт. Онно кырбаныллыбыт хаппыыстаны, моркуобу, уксууһу эбэбит уонна икки күн туруорабыт, онтон сөрүүн сиргэ уурабыт.

Битэмииннээх салаат

Эһиэхэ наада:

1 киилэ помидор;

600 г моркуоп;

500 г эриэппэ луук;

1 киилэ хаппыыста;

500 г минньигэс биэрэс;

500 г сибиэһэй оҕурсу;

1 ыстакаан мас арыыта;

5 ост. ньуоска 9%-наах уксуус;

2 ост. ньуоска туус;

4 ост. ньуоска саахар.

Оҕуруот аһын барытын бөдөҥ гына кырбастыыбыт, тууһу, саахары, уксууһу уонна мас арыытын эбэбит. 10 мүнүүтэ курдук буһарабыт уонна стеризацияламмыт бааҥкаларга кутан уурталыыбыт.

Маринадтаммыт сүбүөкүлэлээх хаппыыста

Эһиэхэ наада:

700 г хаппыыста;

600 г сүбүөкүлэ;

Маринада:

1,5 уу;

2 ост.ньуоска туус;

0,5 ыстакаан 9%-наах уксуус.

Сүбүөкүлэни кырбастыыбыт, хаппыыстаны түөрт өлүүгэ арааран быһабыт. Эмалированнай иһиккэ хаппыыста сэбирдэҕин сүбүөкүлэни кытары уурталыыбыт уонна үрдүгэр итии маринады кутабыт. Ыйааһыннаан тэриэлкэнэн сабабыт уонна 7 күн туруорабыт.

Сүбүөкүлэ сокууска

Эһиэхэ наада:

1 киилэ сүбүөкүлэ;

1 киилэ моркуоп;

1 киилэ биэрэс;

1 киилэ помидор;

3 ост. ньуоска туус;

1 ост.ньуоска саахар;

0,5 ыстакаан 9%-наах уксуус.

Састааппытын кырбастаан баран, 0,5 ыстакаан 9%-наах уксууһу эбэн баран 5 мүнүүтэ буһарабыт. Стеризияцияламмыт бааҥкаларга кутуталаан хаһаанабыт.

Тыква барыанньата

Эһиэхэ наада:

1 киилэ тыква;

1 киилэ саахар;

1,5 ыстакаан уу.

Бастаан сироп буһарабыт. Ууга саахары кутабыт, булкуйабыт, оргутабыт. Сироп ньуоскаттан сап курдук синньигэстик түһэр буоллаҕына – бэлэм.

Онтон тыквабыт хаҕын хастаан ылабыт, сиэмэтиттэн ыраастыыбыт. Быһа холоон 1 см кээмэйдээх гына кырбастыыбыт.

   Тыквабытын көстүрүүлэҕэ уурабыт уонна үрдүгэр сироппутун кутан мөлтөх уокка оргутабыт. Барыанньабыт хараҥа янтарь курдук өҥнөннө да, сөп буолар, ол аата буспут.

Барыанньабытын бэлэмнээбит истикилээҥкэҕэ кутаттыыбыт, хаппахтыыбыт уонна сойбутун кэннэ сөрүүн сиргэ туруорабыт.

Минньигэһи сөбүлүүр дьон састаабын уларытыаххытын, саахарын элбэтиэххитин сөп. Оччотугар 1 киилэ тыкваҕа 1,5 киилэ саахары, 1 ыстакаан ууну кутаҕыт.

Тыква наһаа түргэнник аһара буһан, илдьирийэн хаалар идэлээх. Оннук буолбатын курдук кырбастаммыт тыкваны 1,5%-наах сода суурадаһыныгар (быһа холоон 1 лиитирэ ууга 1,5 чайнай ньуоска соданы кутабыт) 10-15 мүнүүтэ  сытыарыллар.

Дьаабылыкалаах тыква барыанньата

Эһиэхэ наада:

0,5 киилэ тыква;

300 г дьаабылыка (50 г элбэх-аҕыйах буолуон сөп );

450 г саахар;

4 г корица;

120 г грецкэй эриэхэ;

600 г уу.

Тыкваны уонна дьаабылыкалары сууйабыт, хахтыыбыт, сиэмэлэрин ыраастыыбыт. Барытын хайдах баҕарарбытынан кырбастыыбыт.

Эриэхэни ыраастыыбыт уонна хайдах сатанарынан кырбастыыбыт, ол эрэн бөдөҥ гыммаппыт. Онтон хобордооххо арыыта суох  5-7 мүнүүтэ ыһаарылыыбыт.

Көстүрүүлэҕэ уу кутабыт, тыквабытын угабыт уонна мөлтөх уокка буһара туруорабыт.

 Уубут оргуйаары гыннаҕына саахарбытын кутабыт, булкуйабыт.

Оргуйбутун кэннэ дьаабылыкабытын эбэн биэрэбит уонна  30 мүнүүтэ оргутабыт, күүгэнин баһабыт.

Ити кэнниттэн эриэхэбитин уонна корицабытын кутабыт. Булкуйа-булкуйа, өссө 20 мүнүүтэ бытаан уокка оргутабыт.

Буспут барыанньабытын бааҥкаларга кутабыт, хаппахтыыбыт, сөрүүн сиргэ уурабыт.