Күһүҥҥү хомуур буола турар
Аармыйаҕа хомуур үгэс быһыытынан күһүн ыытыллыахтааҕа, быстах мобилизация биллэриллэн, болдьоҕо көспүтэ, ол иһин бу күннэргэ саҥа саҕаланна. Итиэннэ ахсынньы 31 күнүгэр диэри салҕанан барыаҕа.
Дьокуускай куораттан аармыйа кэккэтигэр 600-тэн тахса киһи сулууспалыы барыахтаах. Бу туһунан куорат байыаннай хамыһаара Евгений Крупенков кэпсээтэ.
Кини иһитиннэрбитинэн, мантан аармыйаҕа ыҥырыллан барбыт дьон үксүлэрэ Уһук Илин байыаннай чаастарыгар сулууспалыахтара.
“Быйылгы хомуур үгүс албын сурах тарҕанар буолан ыараата. Срочник-саллааттары байыаннай дьайыыга ыытыахтара диэн туох да оруна суох иһитиннэрии тарҕанар. Сулууспалыы барбыт дьон Донецкай, Луганскай өрөспүүбүлүкэлэргэ, Запорожскай уонна Херсонскай уобаластарга ыытыллыбаттар диэн эрэннэрэбин. Маны тэҥэ кинилэри байыаннай дьайыыларга кытыннарбаттар”, – диэтэ Евгений Крупенков.
ДОСААФ тэрилтэлэригэр байыаннай-учетнай идэни баһылаабыт эдэр дьон ханна сулууспалыылларын талар кыахтаахтар. Байыаннай комиссариат ыытыытынан суоппар идэтин баһылаабыттар 2022 сылга суоппар дастабырыанньатын ылалларыгар госпошлинаттан босхолоноллор.
Призывниктары хомуйар пууннарга бары наадалаах малынан хааччыйаллар, аһаталлар, сим-каарта уонна баан каартатын оҥороллор.
Болдьохторо ааспыт байыаннай сулууспалаахтары увольнениеҕа ыытыы алтынньы 1 күнүттэн саҕаламмыта.
Болдьоҕо көһөрүллүбүт призыв комиссариаттарга ноҕоруусканы үөскэттэ эрээри, Дьокуускайга хомуур хамсааһына былаанынан баран иһэр.
Сонуннар
Ордук ааҕаллар
