Ийэ тылбыт алгыһынан

“Аҕа дойдубут көмүскэлигэр атаарбыт саха хорсун санаалаах уолаттарбытыгар модун санааны саҕар, күүс-күдэх биэрэр хоһооннору айан, алгыс тыллары суруйан сүмэлээх ийэ тылбыт күүһүнэн көмөлөһүөҕүҥ,”- диэн ыҥырыыны Горнай улууһун П.Д.Аввакумов аатынан Киин библиотеката өрөспүүбүлүкэ хоһоон айар дьонугар туһаайан таһааран турар.

Ол курдук, “Саха боотурдарыгар көмөбүт – ийэ тылбыт алгыһа” диэн патриотическай бырайыак чэрчитинэн киирбит айымньылары библиотека социальнай ситимигэр: телеграмҥа уонна Вконтакте тутатына таһааран тарҕаппыттара. Ыҥырыыга өрөспүүбүлүкэ уон араас муннугуттан: Горнай, Абый, Мэҥэ Хаҥалас, Сунтаар, Уус Алдан, Бүлүү, Амма, Нам, Таатта, Кэбээйи улуустарыттан уонна Дьокуускай куораттан кыттыыны ылбыттара. Бу патриотическай тыыннаах, өйү-санааны түмэргэ сүҥкэн суолталаах бырайыак ааптарынан буолар Лена Саввинова, П.Д.Аввакумов аатынан Киин библиотека сэбиэдиссэйэ, уопсастыбаннай сэбиэт бэрэссэдээтэлэ.

Бэлиэтээн эттэххэ, алгыс хоһооннордоох блокнот-хомуурунньук “Офсет” ХЭТ генеральнай дириэктэрэ Скобелева Дария Николаевна спонсордаан, көмөлөһөн 500 ахсаанынан оҥоһуллан тахсыбытын, маны сэргэ “Азбука” ХЭТ генеральнай дириэктэрэ Семенова Нина Васильевна 500 устуука харандаас биэрбитин, бырайыак ааптара Лена Саввинова алтынньы 26 күнүгэр уопсастыбаннай добровольческай штабка туттарбыта. Бу – үтүө санаа бастыҥ холобура. “Ааттаспыт аалы көтөҕөр,” – диэн дэлэҕэ даҕаны этиэхтэрэ дуо? Анал байыаннай эпэрээссийэҕэ сылдьар уолаттарбыт алгыстаах блокнот-хомуурунньугу, бэлиэтэнэргэ аналлаах харандааһы илиилэригэр тутаннар төһөлөөх долгуйбуттара, дойдуларын, дьоннорун ахтыбыттара буолуой? Саныахха санаа чэпчиир, эрэл кыыма саҕыллар... Ийэ тылбыт алгыһынан сүрдэрэ бөҕөх, туруктара чөл буоллар ханнык!

Биллэрин курдук, саха суруйааччыта Күндэ “Төрөөбүт тыл” хоһоонугар: “Төрөөбүт төрүт тыл, сөрүүн сүөгэй курдук, сүрэҕи-быары сөрүүргэтэр, убаҕас отон уутун курдук, улахан куйааска утаҕы аһарар, сырдьыгыныы көөнньүбүт сылгы кымыһын курдук, тостор куйааска тоҕулу ханнарар...” - диэн тыл киһиэхэ күндүтүн, минньигэһин туһунан биир бастакынан этэн турар.

Алгыстаах блокнот-хомуурунньук уолаттарбытыгар күүс-сэниэ эптин, сүбэ-ама, көмө-тирэх буоллун, төрөөбүт дойдуларыгар этэҥҥэ эргиллэн кэллиннэр диэн саха дьоно үрдүк айыылартан үҥэн-сүктэн көрдөһөбүт. Алгыс баһа сыаланнын!

Светлана Самсонова-Сиибиктэ, Кэбээйи, Мукучу