Инженернэй ситимнэр саҥардыллыахтара

2022 сыл алтынньытыгар диэри Дьокуускайга уонна куорат кытыытыгар сытар нэһилиэктэргэ 28 уулусса өрөмүөннэниэҕэ, 23-гэр үлэ номнуо бара турар. Суол оҥоһуутун кэмигэр ураты болҕомто инженернэй     коммуникациялары тупсарыыга ууруллуоҕа. Бу туһунан премьер Андрей Тарасенко министиэристибэлэри, тэрилтэлэри кытта мунньаҕар эттэ.

“Үлэ графиктан хаалбакка, сорох сиргэ урутаан даҕаны баран иһэр. Ил Дархан уу, электричество уонна сибээс ситимин хаачыстыбалаахтык тардыыга туспа сорук туруорда. Биэдэмистибэлэр икки ардыларыгар, суол оҥорооччулары кытта үлэни күүһүрдүөххэ, барыта биир былаанынан барарын ситиһиэххэ”, - диэтэ Андрей Тарасенко.

“Куттала суох уонна хаачыстыбалаах суоллар” национальнай бырайыагынан суол өрөмүөнүн кытта тэҥҥэ инженернэй ситимнэр барыта уларытыллаллар, хаһыыларын буордара уларыйар, ону кытта бордюрдар, ууну аһардар ханаабалар барыта оҥоһуллаллар. Манна Сахатранснефтегаз, Водоканал, Якусткэнерго, ЯТЭЦ уонна Ростелеком бииргэ үлэлэһэллэр.

8 Объекка бырайыактааһын докумуона оҥоһуллан эрэр. Ол курдук, Хатаска, Киллэмҥэ уонна Дьокуускайга баар объектарга үлэ торумнанар. Тимирязев уул. уонна Мархаҕа үлэ от ыйын 15 күнүттэн саҕаланыаҕа. 

«Куттала суох уонна хаачыстыбалаах айан суоллара» национальнай бырайыак чэрчитинэн бу сылга 2,2 млрд. солк. көрүлүннэ. Эһиил бу бырайыагынан 34.16 км усталлаах 31 суол оҥоһуллуоҕа.