Инбэлиит оҕо идэтин хайдах талыан сөбүй?

2021 сылтан саҕалаан «Харысхал» аһымал пуондатыгар инбэлиит уонна доруобуйаларыгар хааччахтаах оҕолор идэни талыыга босхо консультация ылыахтарын сөп. Доруобуйа туруга мөлтөх буоллаҕына, идэни сөпкө талар наһаа наадалаах. Ыарыы үөрэнээччи инники өттүгэр ситиһиилээх буоларыгар идэтин таларга мотивациялаах буолуохтаах. Специалистар этэллэринэн, итиннэ 14 саас ордук табыгастаах буолар эбит. 
«Хомойуох иһин, биһиги үксүгэр стереотип быһыытынан толкуйдуубут. Холобур, хараҕа мөлтөх киһи массажист эрэ буолуон сөп диэн.  273 №-дээх Федеральнай сокуоҥҥа сурулла сылдьарынан, хас биирдии оҕо, статуһуттан тутулуга суох, ханнык баҕарар үөрэх кыһатыгар бэйэтигэр сөп түбэһэр (адаптированнай) бырагырааманан үөрэниэн сөп. Бүгүҥҥү күҥҥэ 20 000 тахса устудьуон колледжтарга үөрэнэр, олортон 200 эрэ киһитэ инбэлиит. Инбэлиит оҕолор үгүстэрэ техникумҥа, колледжка уонна университекка үөрэнэр кыахтаахтарын билбэттэрэ буолуо дии саныыбын», – диир «Харысхал» аһымал пуондатын профориентолога Елизавета Зарубина.

Профориентация өҥөтө дьиэ кэргэҥҥэ ананар, ол иһин консультация оҕолорго эрэ буолбакка, төрөппүттэргэ эмиэ ыытыллар. Бастаан специалист идэни таларга ханнык хайысхалары талар санаалааххытын ыйыталаһар. Онтон салгыы оҕо ыарыыта талар идэтигэр хайдах сабыдыаллыан сөбүн билээри, медицинскэй докумуоннары кытта билсэр. Ити барыта оҕоҕо барсар идэлэри чопчу таларга көмөлөһөр. 
«Ити кэннэ идэни талар методиканы – тестированиены талабыт, ону консультацияҕа олорон эбэтэр дьиэҕэ толоруохха сөп. Тест түмүгүнэн мин тус бэйэтигэр барсар маршрут оҥоробун. Онон сирдэтэн оҕо уонна төрөппүттэр сыалларын ситиһэр курдук хардыылаан бараллар», – диир Елизавета Зарубина.
14 саастарыттан 21 саастарыгар диэри Саха сирин инбэлиит олохтоохторо онлайн эбэтэр офлайн идэни талар консультацияҕа «Харысхал» аһымал пуондатын колл-киинин нөҥүө суруйтарыахтарын сөп: 8 (914)-2-705-887.