Илиҥҥи экономическэй форумҥа Евгений Григорьев Үүнэр көлүөнэ пааркатын туһунан кэпсээтэ

Евгений Григорьев бэлиэтээбитинэн, Саха сирин киин куоратын ахсаана кэнники 20 сыл иһигэр икки төгүл элбээтэ, куорат олохтооҕун орто сааһа – 35. Баһылык Дьокуускай куорат маастар-былаанын олоххо киллэриигэ уопсастыба, оҕолор, ыччат санаалара, интириэстэрэ учуоттанар диэтэ.  

«Ханнык баҕарар куорат салайааччытын баҕа санаата – ыччаты хаалларыы – киһи хапытаалын, кинилэртэн куорат дохуоттаах базата, улаатыыта уонна этэҥҥэ буолуута тутулуктаах. Биллэрин курдук, дойдубут бэрэсидьиэнэ Владимир Путин генеральнай былаантан куорат тутуутун стратегиятын  чопчулуур докумуоҥҥа көһүүнү көҕүлээбитэ. Былырыын, регион баһылыга Айсен Николаев Ыйааҕынан, киин куораппытын ирбэт тоҥҥо бастыҥ куорат оҥорор маастар-былааны оҥорон олоххо киллэриитин саҕалаабыппыт», - диэн кэпсээтэ Евгений Григорьев.

Куорат баһылыга эппитинэн, ыччат иллэҥ кэмин атаарарыгар туһуламмыт бастыҥ быһаарыынан Үүнэр көлүөнэ пааркатын тутуу буолар. Бырайыагы СӨ Үүнэр көлүөнэ пуондата, куорат дьаһалтата уонна бырабыыталыстыба Дом. РФ. өйөбүлүнэн олоххо киллэрэллэр. Иллэҥ кэми атаарарга уонна көхтөөх сынньалаҥҥа анаммыт туона 2025 сылга үлэҕэ киириэҕэ. Билигин үөрэнээччилэргэ аналлаах араас хайысхалаах үөрэҕирии бырагыраамалара ыытыллаллар. «Биһиги оҕолор уонна ыччат саамай наадалаах сатыбыллары баһылыылларын уонна экономика тутаах салааларын тирэҕэ буолалларын курдук кыһаныахтаахпаыт», - диир Үүнэр көлүөнэ пуондатын салайааччыта Владимир Егоров.

Бүгүҥҥү күннээҕи туругунан, паарка территориятыгар 174 сыбаайа туруорулунна, сири тымнытар систиэмэ 100% оҥоһулунна. Быйыл тутуу матырыйаала атыылаһыллар, эһиил эбийиэк бастакы этээһин тутуута саҕаланар.