Ил Дархан вакцинация пууннарыгар сырытта

Өрөспүүбүлүкэ Ил Дархана Айсен Николаев сэтинньи 1 күнүгэр «Туймаада» ТРК уонна 3 №-дээх куораттааҕы балыыһаҕа вакцинация пууннарын үлэлэрин бэрэбиэркэлээтэ. Бу туһунан регион баһылыгын уонна бырабыыталыстыбатын пресс-сулууспата иһитиннэрдэ. 
Куорат 3 №-дээх балыыһатын көрүүтүгэр-истиитигэр киэҥ территория киирэр – Сайсары, Автодорожнай уокуруктар уонна Октябрьскай уокурук сорҕото, итини сэргэ Табаҕа-1, Эргэ Табага, Владимировка уонна Хатас сэлиэнньэлэрэ, Покровскайдыыр уонна Бүлүүлүүр трактар, Хатыҥ-Үрэх уонна Сэргэлээх шоссетын сорҕото, көтөр фабрикатын, ДСК, Радиокиин, Ирбэт тоҥу үөрэтэр институт оройуоннара.
«Куорат 3 №-дээх балыыһата көрөр-истэр территориятыгар баар нэһилиэнньэ улахан дьонун 60%-на быһыыны ылбыт. Булгуччу өрөспүүбүлүкэ үрдүнэн нэһилиэнньэ 80%-на быһыыны ылыан наада, оччоҕо эрэ кэлэктиип иммунитета үөскүөҕэ», — диэбит Айсен Николаев.
Медиктэр эппиттэринэн, «Туймаада» ТРК-ҕа баар вакцинация пуунугар күн аайы 50-60-нуу киһи, онтон  3 №-дээх куораттааҕы балыыһаҕа өрөбүллэргэ 280-ча киһи коронавирус дьаҥын утары быһыыны ылбыт. Уһун өрөбүллэргэ 700-чэ киһи быһыыны ыларын күүтэллэр. 
Вакцинация туспа кэбиниэттэрэ эбии Главпочтамт дьиэтигэр, Хатаска уонна Табаҕаҕа арыллыбыттар. Итини таһынан, олохтоохтор сайаапкаларынан биригээдэлэр сылдьаллар. 
3 №-дээх балыыһа кылаабынай бырааһа Светлана Давыдова эппитинэн, QR-код систиэмэтэ киириэҕиттэн вакцинация тэтимэ 2-3 төгүл үрдээбит. 
Итини таһынан Айсен Николаев балыыһа call-киинин үлэтин кытта билистэ. Итиннэ 22 линия үлэлиир, күн устата 1,5 тыһыынча кэриҥэ киһи собуоннуур эбит. 
Саха сиригэр алтынньы 30 күнүттэн сэтинньи 7 күнүгэр диэри үлэлээбэт күннэр биллэрилиннилэр. Алтынньы 20 күнүттэн  QR-код систиэмэтэ уопсастыбаннай миэстэлэргэ сылдьарга, сэтинньи 1 күнүттэн рестораннарга, кафеларга, остолобуойдарга уонна банкеттыыр саалаларга киирдэ, сэтинньи 8 күнүттэн атыы-эргиэн кииннэригэр киирэр.