Ил Дархан Кубога дойду күүстээх саахыматчыттарын түмүөҕэ

Ил Дархан Кубога дойду күүстээх саахыматчыттарын, норуоттар икки ардыларынааҕы гроссмейстердары, Кубок хаһаайыннарын түмүөҕэ. Кинилэр ортолоругар Арассыыйа чемпионнара Борис Грачёв, Дмитрий Кряквин, Михаил Кобалия, Володар Мурзин, Антон Шомоев, Владимир Барскай уо.д.а. бааллар. Күрэхтэһии кылаабынай судьуйатынан норуоттар икки ардыларынааҕы арбитр, Бүтүн Арассыыйа категориялаах спорт судьуйата Михаил Крюков буолуоҕа.

«Умсугутуулаах интеллектуальнай спорт сүгүрүйээччилэрэ талааннаах спортсменнэр киирсиилэрин илэ харахтарынан көрүөхтэрэ, итини сэргэ, баҕалаах дьон тэҥҥэ буолар сеанска кыттар уонна маастар-кылаастарга сылдьан таһымнарын үрдэтэр кыахтаахтар. Биһиги сборнайбытыгар  уопуттаах спортсменнэр уонна эдэр талааннар бааллар. Интириэһиргиир дьону барыларын спорт интеллектуальнай көрүҥүн киэҥ хабааннаах тэрээһинигэр кэлэн кытталларыгар ыҥырабыт», - диэтэ СӨ Спордун миниистирин бастакы солбуйааччыта Александр Бугаев.

Кыайыылаах 200 тыһыынча солкуобайы ылыаҕа, үрүҥ көмүс призер – 150 тыһыынча солкуобайы, боруонса – 125  тыһыынча солкуобайы. Итиэннэ анал бириистэри туттарыахтара.

Күрэхтэһии тэрийээччилэрэ – Арассыыйа Спордун министиэристибэтэ, «Арассыыйа Саахыматын федерацията» ХЭТ, СӨ Физическэй култуураҕа уонна спортка министиэристибэтэ уонна «Саха Өрөспүүбүлүкэтин Саахыматын федерацията» РУОТ.