Ил Дархан Дьокуускай куорат «Звезднай» уонна «Спортивный» саҥа түөлбэлэрин тутууга былаас бары таһыма үлэлэһиэхтээҕин санатта

От ыйын 15 күнүгэр Ил Дархан Айсен Николаев Өрөспүүбүлүкэтээҕи ипотека агентствота хаарбах дьиэттэн көһөрүү бырагырааматынан тутар «Звезднай» уонна «Спортивнай» түөлбэлэрин боппуруостарынан мунньахтаата.
Мунньах кыттыылаахтара саҥа түөлбэлэр инженернэй тиһиктэрин кэлим схематын, 2017-2032 сылларга үлэлиир Дьокуускай куорат тырааныспарын кэлимник сайыннарыы бырагырааматын чэрчитинэн суолу-ииһи оҥоруу боппуруостарын дьүүллэстилэр. 
Ил Дархан бу икки түөлбэни тутууга үөскүүр бары боппуруостары кэмигэр быһаарыы былаас бары таһымнара көдьүүстээх бииргэ үлэлэһиилэриттэн тутулуктааҕын бэлиэтээн туран, өрөспүүбүлүкэ бырабыыталыстыбатын иннигэр биэдэмистибэлэр икки ардыларынааҕы боппуруоһунан күүскэ ылсан үлэлэһэргэ сорудахтаата. «Хонтуруолунан эрэ буолбакка, күөрэйэр боппуруостары быһаарыынан», - диэтэ Ил Дархан.
Ол курдук, «Звезднай» түөлбэҕэ балаҕан ыйыгар үлэҕэ киириэхтээх 112 МВт  кыамталаах хочуолунайы үлэлэтэр тэрилтэни быһаарарга сорудахтаата. Туһааннаах биэдэмистибэлэргэ тутуллан бүтэр дьиэлэргэ тиэхиньикэ, уопсастыбаннай тырааныспар суола баар буоларын хааччыйарга ыйда. 
Бүгүҥҥү күҥҥэ «Звезднай» түөлбэҕэ 10 элбэх кыбартыыралаах дьиэ тутуллан турар, сотору 7 үлэҕэ киирэрэ күүтүллэр. Оскуола, сабыылаах каток, оҕо саада тутуллаллар, инженернэй ситимнэр, уулусса-суол ситимэ оҥоһуллар. «Олорор дьиэ уонна куорат эйгэтэ» нацбырайыагынан манна хаарбах уонна саахалланар туруктаах дьиэлэр, ол иһигэр 17-с кыбаартал олохтоохторо көһөн кэлэллэр. 
Оттон босхолонор 17-с кыбаартал сиригэр-уотугар «Спортивнай» түөлбэ тутуллар. Билигин манна уопсайа 9 тыһ. кв.м иэннээх бастакы дьиэ, оҕо саада, спорт саалата тутуллан эрэллэр. 11 дьиэ олохтоохторун көһөрүү үлэтэ ыытыллар, диэн иһитиннэрэр Ил Дархан уонна Бырабыыталыстыба пресс-сулууспата. Хаартыска: Андрей Сорокин, СИА.