Ил Дархан Дьокуускай куорат уонна Нерюнгри маастар-былааннарын олоххо киллэриигэ бүддьүөт сайаапкаларын тэтимирдэргэ сорудахтаата

От ыйын 15 күнүгэр Ил Дархан Дьокуускай куонна Нерюнгри куораттар маастар-былааннарынан 2025 сылга олоххо киириэхтээх социальнай уонна инфраструктурнай эбийиэктэр тула бырайыактыыр офис мунньаҕын ыытта. 
Айсен Николаев от ыйын 31 күнүгэр диэри бастакы уочарат үбүлэниэхтээх эбийиэктэри учуоттуур былаан-графиктары оҥорон бигэргэтэргэ сорудахтаата. 
«Дьокуускай уонна Нерюнгри куораттарга кэлэр 2025 сылга хас да даҕаны социальнай эбийиэги тутуу былааннанар – оскуолалар, оҕо саадтара, доруобуйа харыстабылын тэрилтэлэрэ. Онон 2025-2027 сылларга федеральнай бүддьүөтү таһынан атын сайдыы институттарыттан эмиэ элбэх үп киирэрэ ирдэнэр»,– диэн бэлиэтиир Айсен Николаев.

Этиллэр маастар-былааннарынан Дьокуускайга «Спортивнай» түөлбэ, үс уопсастыбаннай туона тутуллаллар, Нерюнгрига киин балыыһа блоктарын өрөмүөнэ, атын даҕаны бырайыактар бааллар.

Өрөспүүбүлүкэ баһылыга федеральнай министиэристибэлэргэ уонна биэдэмистибэлэргэ былааннаах эбийиэктэри үбүлээһиҥҥэ сайаапкалары ыытары түргэтэтэргэ соруйда. Ил Дархан маны сэргэ бырайыак-смета докумуонун хаачыстыбатыгар болҕомто уурарга туһаайда. 
Санатар буоллахха, Дьокуускай уонна Нерюнгри куораттар маастар-былааннара дойду баһылыга Владимир Путин дьаһалынан оҥоһуллубуттара. Өрөспүүбүлүкэ икки бөдөҥ куоратын маастар-былааннарыгар 133 эбийиэк киирбитэ (Дьокуускайга – 90, Нерюнгри куоратыгар – 43), диэн иһитиннэрэр Ил Дархан уонна Бырабыыталыстыба пресс-сулууспата. Хаартыска: Андрей Сорокин, СИА.