Ил Дархан Айсен Николаев киин куоракка тутуллар эбийиэктэри көрдө
![Ил Дархан Айсен Николаев киин куоракка тутуллар эбийиэктэри көрдө](https://kiinkuorat.ru/wp-content/uploads/2024/07/G3x3N3VmUZ.jpg)
От ыйын 12 күнүгэр өрөспүүбүлүкэ Ил Дархана Айсен Николаев баһылыктаах оробуочай бөлөх киин куоракка тутуллар баараҕай эбийиэктэри тутуу хаамыытын кытта билистэ.
Оробуочай бөлөх бастакынан «Звездный» түөлбэҕэ сырытта. Эбийиэктэри тутуу хаамыытын туһунан информацияны Дьокуускай куорат баһылыгын солбуйааччы Антон Алексеенко иһитиннэрдэ.
Ол курдук, 2024 сылга «Звезднай» түөлбэ А сектора толору үлэҕэ киирэн турар, манна 7 элбэх кыбартыыралаах дьиэ баар. Бүгүҥҥү күҥҥэ тутуу С секторга барар, инники 3 элбэх кыбартыыралаах дьиэ киирбит буоллаҕына, эбии 4 дьиэ бүтээри турар, ахсынньы ыйга өссө биир дьиэ киириэҕэ.
Айсен Нинколаев бэлиэтээбитинэн, манна олорор дьиэлэри тутууну сэргэ оскуола, оҕо саада курдук социальнай эбийиэктэр тутуллаллар, эһиил поликлиника тутуута саҕаланыахтаах. Аспааллааһын үлэтэ түмүктэннэҕинэ, оптуобус сырыыта тэриллиэҕэ.
Антон Алексеенко иһитиннэрбитинэн, «Звезднайга» хаарбах дьиэттэн көһөрүү өрөспүүбүлүкэтээҕи бырагырааматынан элбэх киһи дьиэлэммит. Бу сыалга бүгүҥҥү күҥҥэ үс элбэх кыбартыыралаах дьиэ үлэҕэ киирэн турар. Билигин эбии түөрт дьиэ киирээри турар.
Бу кэнниттэн оробуочай бөлөх Арктикатааҕы эпос уонна култуура киинин уонна Судаарыстыбаннай филармония дьиэтин тутууну көрдө.
Дьокуускай куорат маастар-былааныгар киирбит Олоҥхо киинигэр үлэ график быһыытынан бара турар. Санатар буоллахха, эбийиэк 33 тыһ. кв.м иэннээх, 36 м үрдүктээх, сэттэ мэндиэмэннээх.
Салгыы кэккэ предметтэри дириҥэтэн үөрэтэр 29 №-дээх оскуоланы тутуу хаамыытын билистилэр. Эбийиэк «Үөрэхтээһин» национальнай бырайыагынан тутуллар уонна аны күһүн балаҕан ыйыгар номнуо үлэҕэ киириэхтээх.
Антон Алексеенко иһитиннэрбитинэн, оскуола уопсай иэнэ 8 145,9 миэтэрэ, 1 этээскэ алын сһүөх кылаастар кабинеттара, медицинскэй блок, психолог кабинета, технология уонна үлэ уруогун кабинеттара, 312 миэстэлээх остолобуой бааллар, иккис этээскэ — компьютернай, лингафоннай кабинеттар, 224 миэстэлээх аактабай уонна спорт саалалара, үһүс этээскэ эмиэ үрдүкү кылаастар үөрэнэр кабинеттара баар.
Тутуу сакаасчытынан «Главстрой» МХТ буолар, тутааччы – «Оптима-Строй» ХЭТ, диэн иһитиннэрэр Олохтоох дьаһалта пресс-сулууспата.
Сонуннар
Ордук ааҕаллар
![Түөһэйии элбээн иһэрэ дьиксиннэрэр...](/thumbnails/600/300/wp-content/uploads/2024/08/NNDIAGM5TA.jpg)
![Герман Отов: «Пригороднай аныгылыы улахан бөһүөлэк буолар чинчилээх...»](/thumbnails/600/300/wp-content/uploads/2024/09/inhECNdY5z.jpg)
![Баһылык Строительнай уокурук олохтоохторун кытта көрүстэ](/thumbnails/600/300/wp-content/uploads/2024/08/qRWAY5fveB.jpg)
![«Якутск вдохновляет» күрэххэ кыттыҥ!](/thumbnails/600/300/wp-content/uploads/2024/08/zc1WJpfgUt.jpg)