Ил Дархан 2023-2027 сыллары Алексей Елисеевич Кулаковскай Биэс сылынан биллэрдэ

Саха сиригэр 2023-2027 сыллар саха литературатын төрүттээччи, үөрэҕи-билиини тарҕатааччы уонна уопсастыбаннай деятель А.Е. Кулаковскай - Өксөкүлээх Өлөксөй Биэс сылынан биллэрилиннилэр. Ол туһунан ыйааҕы өрөспүүбүлүкэ Ил Дархана Айсен Николаев «Алексей Елисеевич Кулаковский — духовный лидер Якутии» научнай-практическай симпозиумҥа иһитиннэрдэ диэн суруйар Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата.
«Алексей Кулаковскай нэһилиэстибэтэ – Саха сирин халбаҥнаабат сыаннаһа уонна баайа-дуола. Алексей Кулаковскай дириҥ уларыйыылары өтө көрөөччү эрэ буолбатах, кини – Ийэ дойдубут инники кэскилэ тосту уларыйыытыгар олук уурбут киһи буолар. Кини бэйэтин кэминээҕини эрэ буолбакка, үүнэр кэми кэрэһэлиир дириҥ толкуйдаах киһи этэ. Сүүс сыл анараа өттүттэн, үйэлээх устуоруйа нөҥүө биһиги кини үлэлэригэр Саха сирин олохтоохторун кэскиллэрин түстээһинигэр олук ууруллубутун көрөбүт», –диэн бэлиэтээтэ Айсен Николаев.
Хаҥалас улууһун Хачыкаат сэлиэнньэтигэр ыытыллыбыт киэҥ хабааннаах тэрээһиҥҥэ Таатта, Өймөкөөн, Ньурба уо.д.а. атын улуустартан 400-тэн тахса киһи кытынна. Симпозиум үлэтин түмүгүнэн А.Е. Кулаковскай 150 сылыгар анаммыт резолюция оҥоһулунна.