Иэстээхтэри дьиэлэринэн кэрийэллэр

«Якутскэнергосбыт» “ДЭК” ПАО иһитиннэрэринэн, өрөспүүбүлүкэ олохтоохторун уокка-күөскэ, ититиигэ иэһэ 275 мөлүйүөн солкуобайы куоһарар. Нэһилиэнньэ маннык иэстээҕинэн, энергетиктэр баайы-дуолу былдьыырга тиийэ кытаанах миэрэлэри ыларга күһэллэллэр.

Дьокуускай куоракка “Якутскэнергосбыт” үлэһиттэрэ уонна суут бириистэптэрэ иэстээх дьону дьиэлэринэн кэрийэллэр. Биир маннык эриэйдэ кэмигэр уоттарын уонна итиилэрин төлөөбөтөх 12 иэстээх дьоҥҥо сылдьыбыттар.

Бириистэптэр Федеральнай Сокуон 229 ыстатыйатыгар олоҕуран туора дьону сибидиэтэл (понятой) оҥостон, малларын былдьыыллар. Мал былдьаммыта 10 күн иһинэн хаһаайын иэһин төлүөн уонна малын төннөрүөн сөп. Оттон бу болдьох иһинэн иэс төлөммөтөҕүнэ, мал атыыланар уонна ол харчыта иэһи сабыыга бары ирдэбили тутуһан туран барар.

Билигин суут бириистэптэригэр 17 тыһыынчаттан тахса чааһынай киһи уотугар, ититиитигэр уонна итии уутугар иэстээҕин туһунан докумуон бэлэмнэниллэн сытар. Суут бириистэбэ иэстээх дьонтон баан счетун сабар, РФ таһыгар тахсарын хааччахтыыр, ону таһынан сыаналаах малын былдьыыр бырааптаах. Сыл саҕаланыаҕыттан иэстээхтэртэн 15 мөлүйүөн солкуобайтан тахса харчы күүс өттүнэн тутуллубут.

Маннык дьиэнэн кэрийиилэр сыл бүтүөр диэри ыытыллыахтара. Быйыл Саха сирин үрдүнэн 93 эриэйдэ тэрээһинэ былааннанар. Саамай элбэх эриэйдэ Нерюнгри уонна Мииринэй оройуонугар, ону таһынан Дьокуускайга ыытыллыахтара.

Онон энергетиктэр нэһилиэнньэни иэстэрин кэмигэр төлүүллэригэр, быһыыны-майгыны маннык күһэлэҥ миэрэҕэ тиэрдибэттэригэр сүбэлииллэр.