Иэскитин мунньумаҥ, суукка тиэрдимэҥ!

Сорох дьон солкуобай да иэстээх буоллахтарына утуйар уулара  уйгуурар, оттон сорохтор ыйы-ыйдаан мунньаллар. Олох очурдарыгар оҕустарбыт дьон онтон төлөрүйэллэрэ өссө уустук. Ол эрээри аныгы үйэҕэ өҥөнү оҥорор тэрилтэни кытта биир тылы булан, сөбүлэҥ түһэрсиэххэ сөп. Салгыы бу туһунан ааҕааччыларбытыгар сиһилии кэпсиибит. 

Үүт-хайаҕас хаһан баҕарар көстүөҕэ...

Кырдьык, сорохтор ый аайы үтүө суобастаахтык төлөөн иһэллэр, аҕыйах хонук хойутаатахтарына айманаллар, оттон сорохтор иэстэрэ-күүстэрэ күн-түүн эбиллэригэр аахайбаттар, кыһаллыбаттар. Арай ууларын, уоттарын араардахтарына биирдэ “бабат-татат” диэн ыксыыллар.  

Муус устар 24 күнүнээҕи туругунан, Саха сирин нэһилиэнньэтэ уокка уонна ититиигэ 2 миллиард солкуобай кэриҥэ иэстээх. «ДЭК» публичнай акционернай уопсастыба кинилэргэ утары баран, иэстэрин болдьоспут графигынан төлүүллэрин курдук сөбүлэҥ түһэрсэр.

2023 сыл бастакы кыбаарталыгар Саха сирин олохтоохторо оннук 300 дуогабарынан (договор реструктуризации долга) 14 мөл. солк. суумаҕа иэстэрин саппыттар. Сайабылыанньаны олорор сиргитинэн «ДЭК» ПАУо анал пууннарыгар эбэтэр хампаанньа сайтыгар тус кэбиниэт нөҥүө биэриэххэ сөп.

“Иэстээх киһи анал графигынан төлүүрүгэр кыах бэриллэр. Сөбүлэҥ түһэрсэргэ бастакы төлөбүр (первоначальный взнос) ирдэнэр, быраабыла быһыытынан, ол иэс уопсай иэнин 30% тэҥнэһэр. Хаалбыт суумаҕа бытарытан төлүүр кыах (рассрочка) бэриллэр, онуоха өҥөнөн туһаныы билиҥҥи көрдөрүүтүн төлүүр булгуччулаах. Маны сэргэ, иэһи сабыы атын суолларын эмиэ көрүөххэ сөп”, – диэн быһаарар чааһынай килийиэннэри уонна юридическай сирэйдэри кытта үлэлиир управление начаалынньыга Саргылана Аргунова.

Килийиэн хампаанньаны кытта түһэрсибит сөбүлэҥигэр олоҕуран, иэһэ хас да чааска бытарытыллар, ону ый аайы анал болдьоҕунан төлүөн сөп. Онуоха булгуччулаах усулуобуйанан билиҥҥи төлөбүрэ хаалар. Маны барытын тутустаҕына, уокка, ититиигэ хааччахтааһын киирбэт, иэһи суутунан ирдээбэттэр.

Олох ыарахаттарыгар түбэһэн, харчыга улаханнык ыктарбыт дьон дуогабары түһэрсэллэригэр чэпчэтиилээх усулуобуйалар көрүллэллэр. Исписэлиистэр хас биирдии килийиэни кытта туспа үлэни ыыталлар, төлөбүр сууматын ааҕыыга өҥөнөн туһанааччы дохуота учуоттанар. Туһааннаах докумуоннары көрдөрдөххө, бастакы төлөбүр суумата аччатыллыан эбэтэр бытарытан төлүүр  болдьох уһатыллыан сөп.  

Дьокуускай куорат олохтоохторо дуогабары  «ДЭК» ПАУо-ҕа, Федор Попов уул., 6/1,  тиийэн түһэрсиэхтэрин сөп.

Сайаапканы дистанционнай көрүҥүнэн ыытар табыгастаах:

1)  https://www.dvec.ru/yakutiya/ сайтка киирэн, Тус кэбиниэт нөҥүө;

2) https://www.dvec.ru/yakutiya/ сайт Интернет-приемнайын нөҥүө;

Сайаапкаҕа эбии маннык докумуоннар ирдэниллэллэр:

- пааспар;

- бас билии быраабын бигэргэтэр докумуон;

- 30% бастакы төлөбүрү туоһулуур докумуоннар;

- дьиэ кэргэн састаабын туһунан Ф-3 ыспыраапка;

- СНИЛС уонна ИНН.

Субсидия абырыан сөп

Харчыга ыктара сылдьар дьон хомунаалынай иэстэн босхолоноллоругар биир табыгастаах суол – олох-дьаһах хомунаалынай өҥөлөрүгэр субсидия. Өскөтүн дьиэ кэргэн бу өҥөлөргө ороскуота уопсай дохуотун 15% куоһарар буоллаҕына, судаарыстыба көмөтүнэн туһаныан сөп.

2023 сыл муус устар 1 күнүттэн маннык субсидияны биэрии быраабылаларыгар уларыйыылар киирбиттэрин санатабыт. Сиһилии http://subsidii-jku.ru/ сайтка киирэн ааҕыҥ, онно ханнык докумуоннар ирдэнэллэрэ барыта баар.

“Олох-дьаһах хомунаалынай өҥөлөрүгэр төлөбүрдэрин болдьоҕо ааспыт иэстээх дьон субсидия ылыахтарын сөп. Урут иэһэ суох дьоҥҥо эрэ көрүллэрэ. Ол эрээри суут аактата сокуоннай күүһүгэр киирбит буоллаҕына, туорууллар”, – диэн чопчулаан этэр СӨ “Субсидия агентствота” судаарыстыбаннай хааһына тэрилтэтин физическэй сирэйдэри кытта үлэҕэ салаатын начаалынньыгын солбуйааччы Елена Егорова.

Субсидия ыларга сорох усулуобуйалар уруккунан хааллылар:

Арассыыйа, Белоруссия эбэтэр Кыргызстан гражданствота;

олорор төрүөтэ (дьиэни бас билээччи эбэтэр куортамнааччы);

бастайааннай прописка.

Билигин Агентство иэс баарын-суоҕун туоһулуур ыспыраапканы ирдээбэт, бу информацияны ОДьКХ ГИС (судаарыстыбаннай информационнай систиэмэ) нөҥүө ылар.  

Субсидияҕа сайаапканы Элбэх өҥөнү оҥорор кииннэр (МФЦ) салааларыгар эбэтэр Госуслуги порталга “Тус кэбиниэт” нөҥүө биэриэххэ сөп.

«Водоканал» өҥөлөрүнэн туһанааччыларга

Санатабыт: төлөбүргүтүн ый 10 күнүгэр диэри төлүүргүтүн умнумаҥ!

Акционернай уопсастыба иэстээхтэри кытта эмиэ туспа үлэни ыытар. Дьиэни бас билээччи эбэтэр онно бастайааннай пропискалаах киһи рассрочканы Сбербаан филиалларыгар баар «Водоканал» АУо нэһилиэнньэни кытта үлэлиир кииннэригэр тиийэн оҥорторуон сөп. Аадырыстара:

Можайскай уул, 27 (бэнидиэнньиктэн бээтинсэҕэ диэри сарсыарда 9.00 чаастан киэһэ 18.00 чааска диэри, эбиэт кэмэ: 13.00-14.00 ч. Субуотаҕа үлэ кэмэ: 10.00-16.00. Баскыһыанньа – өрөбүл).

Ленин проспегын, 17 (бэнидиэнньиктэн бээтинсэҕэ диэри сарсыарда 9.00 чаастан киэһэ 18.00 чааска диэри, эбиэт кэмэ: 13.00-14.00 ч. Субуотаҕа үлэ кэмэ: 10.00-17.30. Баскыһыанньа – өрөбүл).

Чиряев уул., 5 (бэнидиэнньиктэн бээтинсэҕэ диэри сарсыарда 9.00 чаастан киэһэ 18.00 чааска диэри, эбиэт кэмэ: 13.00-14.00 ч. Субуотаҕа үлэ кэмэ: 9.00-15.00. Баскыһыанньа – өрөбүл).

Ленин проспегын, 56 (чааһынай сектор). Төл. 507-249 (бэнидиэнньиктэн бээтинсэҕэ диэри сарсыарда 9.00 чаастан киэһэ 18.00 чааска диэри, эбиэт кэмэ: 13.00-14.00 ч. Субуотаҕа үлэ кэмэ: 10.00-15.00. Баскыһыанньа – өрөбүл).

Орджоникидзе, 50 (бэнидиэнньиктэн бээтинсэҕэ диэри сарсыарда 9.00 чаастан киэһэ 18.00 чааска диэри, эбиэт кэмэ: 13.00-14.00 ч. Субуота, баскыһыанньа – өрөбүл).

Дуогабар түһэрсэргэ ирдэниллэр докумуоннар:

Пааспар куоппуйата;

дьиэни бас билии быраабын туоһулуур сибидиэтэлистибэ эбэтэр социальнай куортам дуогабара;

Ф-3 ыспыраапка (ылыллыбыт күнүттэн болдьоҕо биир ый) 

Иэскитин уһата-кэҥэтэ, төлүүртэн куотуна сырыттаххытына, «Водоканал» АУо суукка биэрэр бырааптаах.

Ити курдук, тустаах тэрилтэлэри кытта дуогабар түһэрсэн, иэстэн босхолонор үүтү-хайаҕаһы син булуохха сөп. Ол эрээри, мунньубакка, кэмигэр төлөөн испит быдан ордук.