Хоту оройуоннарга сибиэһэй ас тиийиэ

Дьокуускайга норуокка биллэринэн “Пятитысячник” оҕуруот аһын харайар бааза саҥа тыыннанан, “Якутопторг” кууһунан атыылыыр-логистическай киинэ аһылынна. Манна хоту оройуоннарга аналлаах оҕуруот аһа, фрукта уонна социальнай суолталаах табаардар хараллыахтара.
Өрөмүөн үлэтэ 2020 сылтан саҕаламмыта. Эбийиэк түөрт тыһыынча кв. миэтирэттэн тахса иэннээх. Үс тыһыынча туонна хортуоппуй хараллыан сөп, 75 туонна оҕуруот аһа уонна фрукта хараллар холодильниктар, 140 туонна луугу, ону таһынан түргэнник буорту буолар аһы харайар камералар эмиэ бааллар. 
Онон саҥа аһыллыбыт киин хоту улуустарга тиэллэр ас сытыйбакка-ымыйбакка, сибиэһэйдии уонна, саамай сүрүнэ, куораты кэрийбэккэ биир сиртэн тиэллэн барара барыбытыгар үтүө сонун буолла. Маны таһынан, саҥа киинтэн куорат олохтоохторо кэлэн чэпчэки сыанаҕа табаар ылыахтарын сөп.