26.12.2020 | 13:56

Хомус доҕордоох Аэлита Ершова

Хомус доҕордоох Аэлита Ершова
Ааптар: Киин Куорат
Бөлөххө киир

Саха политехническай лицей 9 кылааһын үөрэнээччитэ Аэлита Ершова Бүтүн Арассыыйатааҕы «Синяя птица» куонкуруска Саха сирин ааттатта. Ааспыт өрөбүлгэ кини куоластааһын түмүгүнэн финалга тахсары ситистэ.

Көрөөччүлэр Аэлиталаах Вахтанг нүөмэрдэрин, хомус уонна битбокс дьүөрэлэһиилэрин бэркэ сэргээтилэр-сэҥээрдилэр. Биһиги кыыспыт кыыл-сүөл, көтөр-сүүрэр саҥатын, айылҕа тыаһын-ууһун таһааран, дьон-сэргэ биһирэбилин ылла.  

Кэрэни кэрэхсиир кыыс «Добун» ансаамбылга маҥнайгы кылаастан дьарыктанар. «Атын ханнык да куруһуокка сылдьыбаппын. Иллэҥ кэммэр уруһуйдуурбун сөбүлүүбүн», – диир.

Аэлита Ершова «Синяя птица» куонкуруска сайаапкатын хаһан ыыппытын, ыҥырыыны тутан баран төһө долгуйбутун, хайдах бэлэмнэммитин биһиги ааҕааччыларбытыгар кэпсээтэ.

–Сайаапкабын балаҕан ыйыгар Альбина Михайловна Дегтярева ыыппыта. Икки ый курдук буолан баран, кастины аастыҥ диэн биллэрбиттэрэ. Мин олус үөрбүтүм. Бу иннинэ атын жанрга уопутум суоҕуттан кыратык долгуйбутум.

–Мэлдьи биир хомуһунан оонньуугун дуу эбэтэр хас да инструменнааххын дуу?

–Мин хас да хомустаахпын. Бары тус-туспа тыастаахтар. “Синяя птица” куонкуруска кытта барыам иннинэ саҥа хомустары атыыласпыппыт. Маастардара – Р.Г. Чемчоев уонна Г.Н. Комиссаров. Өссө Москваттан өр сылларга көрдөөбүт, хас да сылы быһа баҕарбыт хомуспун булбутум. Атын хомустарбыттан ураты тыастаах уонна сыаната ыарахан. Ону куонкурус тэрийээччилэрэ бэлэхтээбиттэрэ. Олус үөрбүтүм. Маастара – Литвинов. 

–Вахтаны кытта нүөмэргитин хас күн бэлэмнээбиккитий?

–Икки күн эрэ бэлэмнэммиппит. Ол да буоллар, мин санаабар, барыта табыллыбыта. Сыанаҕа туран эрэ бэйэ-бэйэбитин кытта харахпытынан өйдөһөрбүт, бу кэнниттэн туох кэлэрин музыканан кэпсэтэрбит.

–Көстүүмҥүн ким тикпитэй?

–Эскиһин Эстрада театрын режиссера, дизайнера Амгалена Нотара оҥорбута, сүбэлээн-амалаан биэрбитэ. Ону түргэн-тарҕан туттуулаах Опера уонна балет театрын иистэнньэҥэ Алина Яковлева тикпитэ.

–Кыттааччылары кытта доҕордостуҥ дуо? Туох дьоҕурдаах оҕолор баалларый?

–Бастаан оҕолор бэйэлэрэ кэлэн билсэллэр этэ. Хомуһум тыаһын, кыыллар саҥаларын истэн, дьиктиргээн чугаһыыллара. Кинилэр кыраларын көрүмэҥ. Бары бэйэлэрин көрүҥнэригэр дьиҥнээх виртуозтар. Бииртэн биир дьоҕурдаах оҕолор бааллар: ыллыыр, үҥкүүлүүр, гимнастиканан дьарыктанар, ролигынан хатааһылыыр, араас инструменнарга оонньуур, о.д.а.

–Москва хайдах куорат эбитий? Ханна сырыттыҥ, тугу сонургуу көрдүҥ?

–Москва – олус улахан куорат. Аатырбыт Кыһыл болуоссакка сылдьыбыппыт. Тула өттүбүт сандааран, күлүмүрдээн, олус кэрэ. Барыта уот-күөс, саҥа дьыллааҕы ырыа.

Хомусчут кыыс дьүүллүүр сүбэ хас биирдии тылын долгуйа истибитин үллэһиннэ. Ол курдук, кыттааччылар талааннарын Арассыыйа норуодунай артыыһа Сергей Безруков, эстрада ырыаһыта Дима Билан, виртуоз пианист Денис Мацуев, балет артыыһа Николай Цискаридзе сыаналыыллар. Биһиги кыыспыт нүөмэрин Сергей Безруков олус сөхпүтэ-махтайбыта, Дима Билан биһирээбитин билиммитэ.

Аэлита – ыал кырата, мурун бүөтэ. Владимир диэн улахан убайдаах, Любовь диэн эдьиийдээх.

–Ийэлээх аҕам – миигин мэлдьи өйдүүр-өйүүр күндү дьонум. Кинилэргэ күүс-көмө буолалларыгар махтанабын.

Бу күннэргэ Аэлита түмүктүүр түһүмэххэ бэлэмнэнэр. Ийэтэ Евдокия кэпсээбитинэн, мантан Москва куоракка СӨ үтүөлээх артыыһа Валентина Романова тиийбит.

Эдэркээн хомусчут Чыскыырайы кытта өссө биир хатыламмат нүөмэри бэлэхтииллэрин долгуйа күүтэбит. 

Хаартыскаҕа: айар күрэх түгэннэрэ.

Сонуннар

Ордук ааҕаллар

Биир санаанан салайтаран
Дьон | 19.01.2023 | 13:00
Биир санаанан салайтаран
Норуот сомоҕолоһуута, биир санааланыыта – олохпут сарсыҥҥыга эрэллээх буолуутун олуга. Хаһыаппыт бүгүҥҥү нүөмэригэр Ытык Күөл бөһүөлэгэр түөлбэнэн үлэни салайар бастыҥ уопсастыбанньык, олоххо көхтөөх позициялаах Агафья Савватееваны кытта кэпсэтэбит.
Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
«Сатал» кыһалҕатын быһаарар былаан оҥоһулунна
Сытыы муннук | 20.01.2023 | 13:00
«Сатал» кыһалҕатын быһаарар былаан оҥоһулунна
«Киин куорат» хаһыат ааспыт нүөмэригэр «Сатал» түөлбэҕэ тахсыбыт саахал туһунан суруйан турабыт. Тохсунньу тоһуттар тымныыта саамай муҥутаан турар кэмигэр аны маннык быһылаан хатыламматын, дьон дьиэтэ, гарааһа хам тоҥмотун туһугар олохтоохтор сүрүннүүр бөлөх тэринэн, Ил Дархаҥҥа тиийэ сурук суруйдулар.   Дьокуускайга кытыы түөлбэлэри, тыа хаһаайыстыбатын, атыыны-эргиэни уонна урбааны сайыннарыыга куорат баһылыгын солбуйааччы...
Мөлүйүөҥҥэ тиийэ иликпит
Сонуннар | 21.01.2023 | 17:00
Мөлүйүөҥҥэ тиийэ иликпит
Сахастат 2022 сыл түмүгэр 2021 сыллаахха ыытыллыбыт (2020 сыллаахха ковид ыарыынан сибээстээн көспүтэ) нэһилиэнньэ биэрэпиһин барыллааһын түмүгүн таһаарбыта.  Саха сирин нэһилиэнньэтин ахсаана: 995,7 тыһ. киһи  (2022 сыл тохсунньу 1 күнүгэр 992 115 киһи этэ)