Хомунаалынай тиэхиньикэ паарката саҥардыллара уонна кэҥиирэ былааннанар

Куорат уокуругар суолу көрүү-харайыы хаачыстыбатын тупсарар сыаллаах олохтоох дьаһалта хомунаалынай тиэхиньикэ пааркатын саҥардар уонна кэҥэтэр үлэни ыытар. Төгүрүк суукканан уонна сылынан үлэлиирин учуоттаатахха, аналлаах тиэхиньикэ алдьаныыта-кээһэниитэ  80 %-тан тахсар. Ол туһунан  «Куорат хаһаайыстыбатын үлэлэтэр сулууспа» МХТ иһитиннэрбит. 
«2021 сылга 18 анал тиэхиньикэни атыылаһыы көрүллүбүт, ол иһигэр икки суол массыынатын, алта МТЗ-82.1 тыраахтыры, алта ДЗ-98 грейдери, икки «КАМАЗ 6520» массыынаны, хаар таһааччыны уонна тиэйэр экскаваторы», – диэн кэпсээбит «СЭГХ» МХТ дириэктэрэ Айаал Егинов.
Күн аайы Дьокуускай уулуссаларыгар «Якутдорстрой» АУо 76 аналлаах тиэхиньикэтэ, ол иһигэр 26 «КАМАЗ» самосвал, 18 «КАМАЗ КО-806 ПР» суол массыыната, 3 «КАМАЗ КО-806» тиэхиньикэ, 6 ДЗ-98 грейдер, ТКМ-237 хаар таһааччы, 6 МТЗ баазатыгар тыраахтыр, 6 фронтальнай погрузчик, 5 «Бобкэт» дьоҕус погрузчик, көлүөһэлээх бульдозер уонна погрузчик-экскаватор үлэлииллэр.