ХИФУ «НАУКА 0+» бэстибээлгэ 60-тан тахса балаһаакканы бэлэмниэҕэ

Хотугулуу-Илиҥҥи федеральнай университет 300-чэ үлэһитэ уонна устудьуона үгэс буолбут билим бэстибээлигэр кыттыыны ылыахтара. Тэрээһин быйыл саҥа көрүҥүнэн ыытыллыаҕа. Дьокуускай куорат «НАУКА 0+» региональнай киининэн, оттон ХИФУ тэрийээччинэн талылынна.

Бэстибээл аан бастакытын түөрт күн устата – балаҕан ыйын 4-7 күннэригэр ыытыллыаҕа. Сүрүн быыстапка «Дохсун» спорт комплексыгар ыытыллыаҕа. ХИФУ 60-ча балаһаакканы бэлэмниэҕэ: лиэксийэлэри, маастар-кылаастары, оҕолорго анаан киинэ көрдөрүүтүн уонна эксперименнэри. Ону тэҥэ интерактивнай оонньуулар уонна викториналар, нейросеть кыаҕын көрдөрөр, университет чинчийэр лабораторияларын быыстапкалара баар буолуохтара. Бэстибээл чэрчитинэн барыта 150-тан тахса тэрээһини  СӨ Наукаларын академията, «Север» наука-үөрэх киинэ, Арассыыйа наукаларын академиятын Сибиирдээҕи салаатын Саха сиринээҕи киинэ, Арктикатааҕы судаарыстыбаннай агротехнологическай университет, Арктикатааҕы култуура уонна искусство судаарыстыбаннай института уо.а. ыытыахтара.

 “Үгэс быһыытынан, бэстибээлгэ ХИФУ үлэһиттэрэ эрэ буолбакка, устудьуоннар эмиэ көхтөөх кыттыыны ылыахтара. Оҕолор наукаҕа интэриэстэрин көрдөрөллөрө, лабораториялар ситиһиилэрин киэн тутта билиһиннэрэллэрэ, тэрийэр үлэҕэ кыттыһаллара биһиэхэ улахан суолталаах. “НАУКА 0+” араас балаһааккалары тэрийэн, хас биирдии киһи бэйэтин интэриэһинэн тугу эрэ булуоҕа”, — диэн ХИФУ наукаҕа уонна инновацияҕа проректора Евгений Соловьев бэлиэтээтэ.

Холобура, ХИФУ мэдиссиинэ института бэстибээл кэмигэр “Мэдиссиинэ лааппыта” балаһаакканы арыйан, бэйэтэ оҥорон таһаарбыт БАДтарын, спортивнай аһылыгы уонна тус гигиена бородууксуйатын көрдөрүөҕэ. Оттон ХИФУ сурук-бичик түмэлин “Алпаабыт таабырыннара” истиэндэтигэр ыалдьыттар Новгородов алпаабытын үөрэтэн, былыргы хаһыаттар быһа тардыыларын ааҕыахтарын сөп.

Үүнээйилэри олордор дьон ХИФУ Ботаническай саадыгар Саха сирин флоратын туһунан экскурсиялары сэргиэхтэрэ. Ону биология билимин хандьыдаата Саргылана Захарова иилээн-саҕалаан ыытыаҕа.

ХИФУ инфраструктурнай технологияларын колледжа көмпүүтэр оонньууларын уонна 3D-моделлары оҥорорго саҥа технологиялары уонна тэриллэри билиһиннэриэҕэ, ону тэҥэ устудьуоннар дипломнай үлэлэрин презентациятын ыытыаҕа. Маны таһынан “Молекулярнай мэдиссиинэ уонна киһи генетиката” научнай-чинчийэр лаборатория “Генетика 0+” диэн интерактивнай демо-лабораторияны көрдөрүөҕэ, бу оҕолорго эрэ буолбакка, улахан дьоҥҥо эмиэ интэриэһинэй буолуоҕа.