ХИФУ лицеиһа химияҕа БКЭ 100 баалга туттарда

ХИФУ лицейин 11 кылааһын үөрэнээччитэ Луиза Бариева химияҕа БКЭ 100 баалга туттарда.
Быйылгы үөрэх дьылыгар кини бастакы 100 бааллаах үөрэнээччинэн буолла. Луизаны сэргэ химияҕа үрдүк баалы өссө икки үөрэнээччи ылла – Инна Окоемова (93 баал) уонна Михаил Соколов (90 баал). 
ХИФУ иһинэн үлэлиир анал үөрэтэр-научнай киин дириэктэрэ Милана Федотова эппитинэн, быйыл лицейи химико-технологическай уонна биолого-экологическай хайысха үөрэнээччилэрэ бүтэрэллэр. 
«10 уонна 11 кылааска оҕолор сорох кэмҥэ дистанционнай көрүҥүнэн үөрэммиттэрин да иһин былырыыҥҥы көрдөрүүттэн итэҕэс туттарбаттар ини диэн эрэммиппит. Луиза химико-технологическай хайысха үөрэнээччитэ, химияны 100 баалга туттаран үөрдүтэлээтэ. Кини биһиэхэ Уус-Майа орто оскуолатыттан кэлбитэ. Икки сыл тухары бэйэтин үлэһит, туруоруммут сыалын ситиһэр үөрэнээччи быһыытынан көрдөрдө. Луиза – 2019, 2020 сыллардааҕы химияҕа турнир регионнааҕы түһүмэҕин кыайыылааҕа уонна призера. 2020 сылга “АгроНТИ” регионнааҕы түһүмэҕин кыайыылааҕа», - диэн кэпсиир Милана Федотова. 
«Бэс ыйын 14 күнүгэр химияҕа БКЭ түмүктэрэ кэлбиттэригэр наһаа үөрбүппүт. Үрдүк ситиһиим иһин лицей учууталларыгар дириҥ билиини биэрбиттэрин иһин махтаныахпын баҕарабын. Химия эксээмэнигэр мин икки сылы быһа бэлэмнэммитим. Онно элективнай куурустар уонна лицей консультациялара улаханнык туһалаабыттара. Наһаа элбэхтик суоттуур этим, оннооҕор ийэм университекка суруммут лиэксийэлэрин туһанааччыбын. Эксээмэн иннигэр долгуйбутум, ол эрэн бэйэм билиибэр эрэнэр этим. Баҕа санаам – медицинскэй университекка үөрэнэ киирии. Хирург быраас буолан дьоҥҥо көмөлөһүөхпүн баҕарабын», - диэн Луиза Бариева санаатын үллэстэр.