ХИФУ хонтуруолу кытаатыннарда

Пермь куорат университетыгар буолбут хомолтолоох быһылаан кэнниттэн М.К.Аммосов аатынан Хотугулуу-Илиҥҥи федеральнай университет куттал суоһаабат миэрэлэрин кытаатыннарда. Ол туһунан университет пресс-сулууспата иһитиннэрдэ.
"Хотугулуу-Илиҥҥи федеральнай университет уонна тус бэйэм ааппыттан Пермь судаарыстыбаннай универстетыгар суорума суолламмыттар чугас дьонноругар уонна эмсэҕэлээбиттэргэ дириҥ кутурҕаммын тиэрдэбин. Биһиги маннык алдьархайтан улаханнык хараастабыт, ханнык баҕарар батталы утарабыт. Эйэлээх олоххо маннык алдьархайтан дьон суорума суолланналлара өйгө баппат быһыы буолар", – диэбит ХИФУ ректора Анатолий Николаев.
Быһылаан кэнниттэн университет куорпустарыгар уонна устудьуоннар олорор уопсайдарыгар бэрэбиэркэни ыыппыттар. Харабынайдар суһал ыҥырыы туочукатын уонна видеонан кэтээн көрүүнү бэрэбиэркэлээбиттэр, куттал суоһаабатын курдук дьаһаммыттар.
Санатан эттэххэ, балаҕан ыйын 20 күнүгэр тахсыбыт алдьархайга 6 киһи өлбүтэ, 28 киһи эмсэҕэлээбитэ.