ХИФУ филологическай факультета YouТube ханаалга литературнай булуогу арыйар буолла

М.К.Аммосов аатынан ХИФУ филологическай факультета, ыччат дьыалаларыгар  федеральнай агентство гранынан наҕараадаланан, YouТube ханаалга өрөспүүбүлүкэҕэ аан бастакы литературнай булуогу арыйар буолла. Ол туһунан ХИФУ пресс-сулууспата иһитиннэрдэ. 
Хабаровскай куоракка ыытыллыбыт «Амур» Ыччат форумун чэрчитинэн, ХИФУ филологическай факультетын старшай преподавателэ Дмитрий Жирков сырдатар үлэҕэ медиабырайыагы олоххо киллэрэргэ 300 тыһыынча солкуобайдаах граны сүүйбүт. 
Кини куорат тас көрүҥүн диджитал-үнүстүрүмүөннэр көмөлөрүнэн уус-ураннык оҥорон көрүү медиабырайыагын көмүскээбит. Дмитрий Жирков салалтатынан 11 медиакиинэ оҥоһуллуохтаах. 
«Факультет Саха сиригэр бастакы уонна соҕотох литературнай булуогу YouТube ханаалга таһаарар буолла. Биир сыл тухары ХИФУ устудьуоннарыттан турар хамаанда, ааҕыыны сөбүлүүр дьон ортотугар 11 сыаналаах бириистэрдээх айар күрэхтэри ыытыаҕа», – диэбит Дмитрий Жирков.
Булуокка киин куорат култуурунай олоҕо литературнай тиэкистэр көмөлөрүнэн сырдатыллыаҕа.