Хатастар онлайн ыһыахтыахпыт

Наталья Руфова – “Тускул” култуура киинин уопсастыбаннай түмсүүлэрин салайааччыта:

– Саха киһитэ орто дойду олоҕуттан биир саамай сыаналыыр, күүтэр, кэтэһэр, бэлэмнэнэр, санаата көтөҕүллэр кэмэ –  сайын барахсан. Ол да иһин, ырыаҕа-хоһооҥҥо хоһулларыныы, ''өртөн ыла бэлэмнэнэн'', сааһыттан тутулуга суох  сылын ахсын салгыбакка ыһыах бырааһынньыктаах. Ол хас биирдии киһи сүрэҕэр ийэ эмиийин илгэтин кытта иҥпит кэһиллибэт үгэспит.

 Быйылгы ыһыах олох хардыытын балаһыанньатынан бэрт дьиктитик ааһыахтаах. Ол гынан баран, биһиги, сахалар, сатаммата диэн саллыбат, табыллыбата диэн толлубат идэлээхпит. Онон хас биирдии ыал тэлгэһэтигэр бэйэтин чугас дьонун кытта көрсүө диэн эрэллээхпит.  Дьокуускай куорат дьаһалтатын быһаарыытынан бу күннэргэ хас биирдии ''Сэрии оҕото'' диэн статустаах аҕам дьоммутугар алгыс алаадьытын састаабын уонна сиэр-туом отун бэлэх ууннулар.

Бүгүҥҥү күҥҥэ Хатаска оннук бэлэҕи 108 киһиэхэ түөлбэлэр салайааччылара уонна көмө буолар дьонноро, Хатас дьаһалтатын үлэһиттэрэ түҥэттилэр. 

 Биллэн турар, омос көрдөххө, тугун кыратай диэххэ сөп эрээри, сүрүн суолтата – болҕомто. Онон бүгүҥҥү күн чаҕыл уотун курдук сырдык санаа сыдьаайдаах буолла, сүүһүнэн киһи болҕомто диэни биллэ. Эбээлэрбит, ийэлэрбит үөрбүт харахтарыттан кинилэр чугас дьонноро эмиэ үөрдэхтэрэ.

Киһиэхэ кып-кыра, быычыкаайык наада. Бары этэҥҥэ буолуоҕуҥ!