Хатаска спорт комплекса тутуута түмүктэнэн эрэр

Эбийиэк «2020-2024 сылларга Саха Өрөспүүбүлүкэтигэр физическэй култуураны уонна спорду сайыннарыы», «2017-2032 сылларга Дьокуускай куорат социальнай инфраструктуратын комплекснайдык сайыннарыы» бырагыраамаларынан уонна Ил Дархан «Саха Өрөспүүбүлүкэтин киин куоратын – Дьокуускай куораты 2032 сылга диэри сайыннарыы» ыйааҕын чэрчитинэн тутуллар. Үбүлээһин суумата – 284 мөлүйүөн солкуобайтан тахса.  

Саҥа спортивнай эбийиэк бастакы сыбаайата 2021 сыл атырдьах ыйыгар түһэриллибитэ.

Билигин спорт комплекса иһинээҕи үлэтэ ыытыллар: истиэнэни кырааскалыырга бэлэмнииллэр, муостаны оҥороллор, итиннэ 35 тутааччы үлэлиир. Эбийиэк икки дьоҕус уонна биир улахан саалалаах, таһыгар аһаҕас халлаан анныгар дьарыктанар балаһааккалаах.

Олохтоох дьаһалта физическэй култуураҕа уонна спортка управлениетын начаалынньыга Эдуард Ефимов бэлиэтээбитинэн, эбийиэк 2024 сыл саҥатыттан үлэтин саҕалыаҕа. Оҕолор уонна улахан дьон спорт араас көрүҥүнэн, ол иһигэр мас тардыһыытынан дьарыктаналларыгар бары усулуобуйа тэрилиннэ.