Харыйаны кэрдии иһин ботуччу ыстараап көрүллэр

«Саҥа дьылга бэлэмнэнии үгэннээн турар кэмэ. Саха сирин лесничествота  харыйаны харыстыырга, харабыллыырга туһуламмыт үлэни ыытар. Ол курдук, сэрэтэр үлэ чэрчитинэн, гражданнары кытта кэпсэтэбит, эриэйдэлэри ыытабыт, билиҥҥитэ сокуону кэһии түбэлтэтэ тахса илик. Көҥүлэ суох маһы кэрдии иһин ыстараап көрүллэрин санатыахпытын баҕарабыт. Ыстараап суумата харыйаны атыылаһан ылбыттааҕар ботуччу буолар», – диир Шестаковскай учаастактааҕы лесничество үлэһитэ Айаал Баишев.

Маһы кэрдии ойуурга хоромньуну таһаарара биллэр. Сокуоннайа суох маһы кэрдиинэн дьарыктаныы иһин ыстараап көрүллэр. Ол курдук, маһы кэрдии иһин ыстараап кээмэйэ гражданнарга – 3000-4000 солкуобай, дуоһунастаах сирэйдэргэ – 20 000-40 000 солкуобай,  юридическай сирэйдэргэ – 200 000-300 000 солкуобай.

Тиэхиньикэни туһанан кэрдибит буоллахтарына, эбэтэр харыстанар зонаҕа кэрдии иһин, холуобунай буруйу оҥоруу бэлиэтэ суох буоллаҕына, ыстараап суумата гражданнарга – 4000-5000 солкуобай, дуоһунастаах сирэйдэргэ – 40 000-50 000 солкуобай, юридическай сирэйдэргэ – 300 000-500 000 солкуобай. Кэрдибит мастара уонна туттубут тэриллэрэ былдьанар.

Хоромньу кээмэйэ кыра буоллаҕына ыстараап суумата 5000 солкуобайга диэри. Мас сэдэх көрүҥүн кэрдии иһин холуобунай миэрэ туттуллуон сөп.

Маһы атыылаһыы, эбэтэр атыылааһын дуогабарын Дьокуускайдааҕы лесничествоҕа эбэтэр «Якутлесресурс» филиалыгар түһэрсиэххэ сөп.