«Харысхал» аһымал пуондата өрөспүүбүлүкэтээҕи аахсыйаны саҕалаата

Аахсыйа оскуола үөрэнээччилэригэр, ол иһигэр маҥнайгы кылааска киирэр кырачааннарга ананар. Үөрэх дьылын аһымал аахсыйаттан саҕалаан, оҕолор үтүө дьыаланы оҥороллор, бэйэлэригэр сиэрдээх майгыны, эппиэтинэһи, аһыныгас буолууну сайыннараллар.

Тэрээһин сүрүнэ – балаҕан ыйын 1 күнүгэр кыттыһан учууталга биир улахан сибэкки дьөрбөтүн атыылаһыы уонна ордубут харчыны эмпкэ наадыйар инбэлиит оҕолорго ыытыы.

Быйыл киирбит сириэстибэ Петя Матвеевка тыҥатын вентиляциялыырга анаммыт небулайзеры атыылаһыыга барыаҕа. Ити көмөҕө 128 997,40 солкуобайы хомуйар сорук турар. Оҕо диагноһа олус уустук,  ИВЛ-аппараатыттан арахсыбакка эмтэнэрин курдук Aeroneb Pro саҥа небулайзер ирдэнэр.

Аахсыйаҕа кыттарга 89142705887 нүөмэргэ сайаапканы уонна дааннайдары ыытыллар:

1) Үөрэх кыһатын аата;

2) Кылаас салайааччытын араспаанньата, аата, аҕатын аата;

3) Сибээстэһэр нүөмэр;

4) Кыттар оҕолор ахсааннара.

Бары үөрэнээччилэргэ «Добро в руках» аахсыйа атрибуттарын –  флажоктары, закладкалары, сертификаттары уонна кылаас аатыгар махтал суругу туттарыахтара.