Хапытаалынай өрөмүөҥҥэ иэстээхтэргэ ирдэбил ыытылынна
«СӨ элбэх кыбартыыралаах дьиэлэрин хапытаалынай өрөмүөнүн пуондата» тэрилтэ иһитиннэрбитинэн, иэстээх дьоҥҥо ыйын аайы ирдэбил барар. Сорох түбэлтэлэргэ ирдэбил мировой судьуйаҕа тиийэн көрүллэр.
2023 сыл сэтинньи 1 күнүнээҕи туругунан, бас билээччилэр ааттарыгар: 15 353 физическэй уонна 184 – юридическэй сирэйдэргэ хапытаалынай өрөмүөҥҥэ иэһи төлүүр туһунан 15 537 ирдэбил ыытылынна.
Сыл устата суут бириистэптэригэр 65 мөлүйүөнтэн тахса кээмэйдээх 3 000-тан тахса бирикээс ыытылынна. Иэс төлөммөт буоллаҕына бириистэптэр үбү-харчыны уонна бас билиини былдьыыр бырааптаахтар. Итинтэн сиэттэрэн Пуонда иэһи суукка тиэрдибэккэ төлүүргэ сүбэлиир.
Дуогабар түһэрсэн, иэһи ыйдарынан үллэрэн төлүөххэ эмиэ сөп. Дуогабары түһэрсии кэннэ пени ааҕыыта тохтуур. Маны сэргэ, хапытаалынай өрөмүөн төлөбүрэ ый ахсын 10-с чыыһыла иннинэ төлөнүөхтээҕин санаталлар. Пуонда 10 сыллаах үбүлүөйүнэн сибээстээн, сэтинньи 15 күнүттэн 31 күнүгэр диэри төлөбүрү пенины аахпакка ылаллар. Иэстээхтэр түгэни мүччү тутумаҥ!
Сонуннар
Ордук ааҕаллар
