Хаардаах кыһын эбии үбүлээһини эрэйэр

Баһылык эбээһинэһин толорооччу Евгений Григорьев куорат уокуруктарын уонна таһынааҕы нэһилиэктэрин санитарнай туруктарын туһунан мунньаҕы иилээн-саҕалаан ыытта.

Бэбиэскэҕэ хаары ыраастааһын, анал туочукалартан кытаанах бөҕү тиэйиини хонтуруоллааһын, бастыҥ салайар хампаанньалары быһаарыы уонна ыраастааһын үс ыйыгар бэлэмнэнии боппуруостара көрүлүннэ. 

Евгений Григорьев дьиэлэр үрдүлэриттэн уонна таһынааҕы сирдэриттэн хаары ыраастааһыҥҥа салайар хампаанньалары кытта үлэни күүһүрдэргэ соруйда. “Куорат хаһаайыстыбатын үлэлэтэр сулууспа” муниципальнай хааһына тэрилтэтин хаары тиэйиигэ, саас ууну хачайдыырга эбии үбүлээһиҥҥэ этии киллэрэригэр дьаһайда. Ону таһынан бастыҥ көрдөрүүлээх салайар хампаанньалар рейтиннэрин оҥоруҥ диэтэ.

Быйыл киин куоракка хаһааҥҥытааҕар да хаардаах  кыһын буолла. 2020 сылга хаар полигонугар 566 тыһыынча куб.миэтэрэ хаар тиэйиллибит. Оттон 2019 сылга – 428 тыһыынча. Кэнники уон сылга ортотунан 300-350 тыһыынча куб.миэтэрэ хаар ыраастанар эбит.