Хаарбах дьиэттэн көһөрүү тэтимин ыһыктыбат

Хаарбах дьиэттэн көһөрүүгэ Дьокуускай куоракка икки улахан бырагыраама үлэлиир –  «2019-2025 сылларга гражданнары хаарбах туруктаах дьиэттэн көһөрүү» өрөспүүбүлүкэ бырагырааматын таһынан 150 мөл. солк. бүддьүөттээх муниципальнай аадырыстаах бырагыраама.

17-с кыбаартал

Норуокка «17-с кыбаартал» диэнинэн биллэр Строительнай уокурук 2а, 2б, 2г, 4а, 4б, 4в, 17-с кыбаарталларыттан Өрөспүүбүлүкэтээҕи «2019-2025 сылларга нэһилиэнньэни хаарбах дьиэттэн көһөрүү» аадырыстаах бырагырааманан 11 элбэх кыбартыыралаах дьиэ көһөрүлүннэ, диэн иһитиннэрэр киин куораттааҕы Дьиэ-уот сыһыаннаһыыларыгар департамент.

Үс хаарбах дьиэттэн иккитэ көтүрүлүннэ, олохтоохтор муниципальнай бырагырааманан көһөрүлүннүлэр, биир дьиэҕэ биир кыбартыыра көһөрүллэ илик, ол эрээри күүс өттүнэн көһөрүүгэ суут быһаарыыта баар.

Икки хаарбах дьиэ 2025 сыл ахсынньы 31 күнүгэр диэри көһөрүллүөхтэрэ.

Докумуоннары тутуу Дьиэ-уот сыһыаннаһыыларыгар департамеҥҥа ыытыллар: Дьокуускай к., Дзержинскэй уул., 21, 8-с каб., үлэлиир бириэмэтэ: 09.00-12.00 чч., төлөпүөн: 8 (4112) 22-60-48. 

Көһөрүү болдьоҕун уонна усулуобуйатын туһунан консультациялары «Өрөспүүбүлүкэтээҕи ипотека агентствота» Сакаасчыт сулууспата АУо 8 (4112) 50-86-30 төлөпүөнүнэн эбэтэр: Дьокуускай к., Орджоникидзе уул., 17 аадырыһынан ылыахха сөп. Үлэлиир бириэмэлэрэ: 08.30 - 18.00 чч., эбиэккэ тохтобул: 12.30-14.00 чч.

«Өрөспүүбүлүкэтээҕи ипотека агентствота» (РИА) муус устар 11 күнүттэн cаҥа тутуллар «Спортивнай» дьоҕус оройуоҥҥа көһө сылдьар офиска гражданнартан докумуоннары тутуу уонна көһөрүү туһунан консультациялары ыытар.

Көһө сылдьар офис оптуорунньук уонна чэппиэр ахсын сарсыарда 10:00-12.30 чч. Пионерскай уул., 38/1 дьиэтигэр 12-с кыбартыыраҕа  үлэлиир.

Сиһилии РИА нэһилиэнньэни көһөрүүгэ салаатын төлөпүөннэринэн билсиэххэ сөп: 8(4112) 50-86-30, 8(924) 163-33-68.

«Спортивнай» дьоҕус оройуоҥҥа 46 элбэх мэндиэмэннээх дьиэ, 2 оҕо саада, 2 оскуола, элбэх функциялаах спорт комплекса тутуллуохтара. Оройуоҥҥа барыта 14 тыһыынча кэриҥэ киһи дьиэлэниэҕэ, диэн иһитиннэрэр «РИА» СЗ АУо пресс-сулууспата.

160 элбэх кыбартыыралаах дьиэ, ол иһигэр сокуонунан көһөрүллэргэ уонна көтүрүллэргэ билиниллэ илик 6 дьиэ, Саха Өрөспүүбүлүкэтин Бырабыыталыстыбатын 2023 сыл олунньу 28 күнүнээҕи 149-р нүөмэрдээх 2а, 2б, 2г, 4а, 4б, 4в, 17-с кыбаарталлары комплекснай сайыннарыы туһунан дьаһалынан көһөрүллүөхтэрэ.

Саха Өрөспүүбүлүкэтин Бырабыыталыстыбатын территориялары комплекснай сайыннарыы туһунан быһаарыытын олоххо киллэрэр юридическай сирэйинэн «Өрөспүүбүлүкэтээҕи ипотека агентствота» Сакаасчыт сулууспа АУо (РИА) анаммыта.

Бастакынан социальнай суолталаах эбийиэктэри, ол эбэтэр оҕо саада уонна спорт комплекса тутуллар миэстэлэригэр турар 5 дьиэ көтүрүллэрэ былааннанар – Жорницкай уул., 40, 42, Пионерскай уул., 8/2, Якутская уул., 12, 14.

Ханнык докумуоннар ирдэнэллэрий?

Ыйытык:

* Олорор дьиэбит хаарбах туруктааҕын туһунан официальнай докумуону ыларга тугу гыныахтаахпытый?

 * Дьиэни экспертизалатарга ханнык докумуоннар ирдэнэллэрий?

* Эскпертиза өҥөтө төлөбүрдээх дуо?

Хоруй:

* Дьиэ-уот сыһыаннаһыыларыгар департамент исписэлиистэрэ: Олорор дьиэлэр хаарбах туруктаах уонна саахалланар кутталлаах быһыытынан Аакта уонна Биэдэмистибэлэр икки ардыларынааҕы хамыыһыйа түмүгүнэн билиниллэллэр, балары Олохтоох дьаһалта бигэргэтэр.

Олорор дьиэҕэ киһи олорор усулуобуйата суоҕунан ааҕарга, элбэх кыбартыыралаах дьиэни көтүрүллүүгэ уураахтыырга РФ Бырабыыталыстыбатын уурааҕынан бигэргэммит балаһыанньа 45-ис пуунугар олоҕуран, дьиэни-уоту бэрэбиэркэлииргэ, Биэдэмистибэлэр икки ардыларынааҕы хамыыһыйаҕа ыытарга маннык докумуоннар наадалар:

1) Элбэх кыбартыыралаах дьиэни хаарбаҕынан билинэргэ кэлэктиибинэн суруллубут сайабылыанньа;

2) Дьиэни бас билии быраабын бигэргэтэр докумуоннар куоппуйалара;

3) Анал тэрилтэ дьиэни бэрэбиэркэлээн таһаарбыт түмүгэ, (инструментальнай хонтуруол, лабораторнай чинчийиилэр түмүктэрэ).

Манна эбэн эттэххэ, Дьокуускай куорат Олохтоох дьаһалтата анал тэрилтэлэргэ тэхиньиичэскэй бэрэбиэркэ ыытарга сыллата харчы тыырар, ол аата экспертизаны төлүүр кыаҕа суох мас дьиэлээх дьоҥҥо көмө оҥоһуллар.

Хаарбах дьиэттэн көһөрүү – Арассыыйаҕа иккис иһэбит

Саха сирэ дойду үрдүнэн хаарбах дьиэттэн көһөрөргө тутуллубут дьиэлэрин ахсаанынан иккис миэстэҕэ сылдьар. Бүтэһик биэс сыл иһигэр «Хаарбах дьиэттэн көһөрүү» федеральнай бырагырааманан номнуо 740 тыһ. кв. миэтэрэлээх хаарбах дьиэ көтүрүлүннэ, саҥа кыбартыыралары 40 тыһ. тахса киһи ылла. Бырагырааманы түмүктүүргэ 300 тыһ. тахса кв миэтэрэҕэ олорор 20 тыһ. киһини көһөрөр хаалла.

Ил Дархан Айсен Николаев дойду баһылыга Владимир Путинныын кулун тутар 14 күнүгэр көрсөрүгэр хаарбах дьиэттэн көһүүгэ эбии үп-харчы көрүллэр боппуруоһун дьүүллэспитэ. Бу миэрэ бэрэсидьиэн Федеральнай Мунньахха туһаайыытыгар олохтообут «Хаарбах дьиэттэн көһөрүү» саҥа бырагырааматыгар киириэхтээх. Онон бырагыраама чэрчитинэн сир сайдыытын пуондатыгар эбии үбү-харчыны көрүүгэ өрөспүүбүлүкэ биэрбит сайаапкатын бигэргэтиэхтэрин сөп. Тоҕо диэтэххэ Саха сирэ харчыны сөптөөхтүк туттан, туруоруллубут сыалы-соругу ситиһэрин көрдөрдө.

Ону тэҥэ кэлиҥҥи сылларга, араас таһымнаах чинчийиилэр, экспертэр бэлиэтииллэринэн, өрөспүүбүлүкэ климатын уонна сирин уратыта дьиэни тутууга инновационнай ньымалары ирдиир. Тоҥ мууска дьиэни тутарга өр турар акылаакка улахан болҕомто ууруллар, ону тэҥэ сыл устата температура халбаҥнааһынын учуоттуохха наада буолар. Манна сылааһы, итиини тутар матырыйааллары туттар наада. Саха сирин исписэлиистэрэ аныгы ньымалары хото тутталлар. Ол эрээри бу барыта элбэх үбү-харчыны эрэйэрэ биллэр.

Саха сиригэр аныгы тутуу технологиялара киирэн эрэллэр. Бу технологиялар национальнай бырайыак олоххо киирэр тэтимин эмиэ түргэтэтэллэр. Арктика оройуоннарыгар мастан дьиэни тутуу технологията ордук ирдэнэр. Инновационнай тутуу ньымаларын көмөлөрүнэн чааһынай олорор дьиэлэр уонна элбэх кыбартыыралаах дьиэлэр тутуулара түргэтээбитэ бэлиэтэнэр. Холобур, былырыын Өлөөҥҥө аан бастаан монолитнай тутуу технологията туттуллубута.

***

2030 сылга диэри киин куорат үрдүнэн биир да хаарбах туруктаах дьиэ хаалыа суохтаах. Холобур билиҥҥи 17-с кыбаартал сөргүтүллэн саҥа «Спортивнай» дьоҕус оройуоҥҥа кубулуйуохтаах. Манна саҥа оскуола, оҕо уһуйаана, спортивнай саала тутуллан үлэҕэ киириэхтээх. «Спортивнай» дьоҕус оройуону тутарга 90 тыһыынча квадратнай миэтэрэ эргэ дьиэни көтүрэн, ол миэстэтигэр 46 олорор дьиэ тутуллуоҕа.