Хаарбах дьиэттэн көһөрүү икки бырагырааманан ыытыллар

Хаарбах дьиэттэн көһөрүүгэ Дьокуускай куоракка икки улахан бырагыраама үлэлиир - «2019-2025 сылларга гражданнары хаарбах туруктаах дьиэттэн көһөрүү» өрөспүүбүлүкэ бырагырааматын таһынан 150 мөл. солк. бүддьүөттээх муниципальнай аадырыстаах бырагыраама. 
Дьиэ-уот сыһыаннаһыыларыгар департамент дириэктэрин солбуйааччы Вадим Семёнов иһитиннэрбитинэн, Дьокуускай куоракка 2017 сыл тохсунньу 1 күнүттэн хаарбах туруктааҕынан билиниллибит дьиэлэр чуолаан муниципальнай бырагыраама суотугар көһөрүллэллэр. Холобура, 17-с кыбаартал үс дьиэтэ - Жорницкай уул., 19 уонна, 21, Пионерскай уул., 13 - дьиэлэрэ - бу бырагырааманан көһөрүллүбүттэрэ. Ол курдук, холобура, Жорницкай уул., 19 дьиэтин тымныы маҥнайгы этээһигэр хааччыллыыта суох үс хостоох кыбартыыраҕа олорбут Зоя Антонова муниципальнай бырагырааманан Свердлов уул., 18 икки хостоох толору хааччыллыылаах кыбартыыраҕа көһөн, куорат салалтатыгар махтала муҥура суох. 
Үөһээ бэлиэтээбиппит курдук, муниципальнай бырагырааманы сэргэ өрөспүүбүлүкэ бырагырааматынан билигин 162 саахалланар туруктаах дьиэ көтүрүллүөхтээҕиттэн бүгүҥҥү туругунан 60 дьиэ олохтоохторо номнуо саҥа толору хааччыллыылаах кыбартыыра хаһаайыттара буолан олороллор.