Хааччахтыыр миэрэлэр бэс ыйын 15 күнүгэр диэри уһаатылар

СӨ Ил Дархана Айсен Николаев ыам ыйын 28 күнүнээҕи ыйааҕынан коронавирус дьаҥынан хааччахтыыр миэрэлэр бэс ыйын 15 күнүгэр диэри уһатылыннылар. Ыйаах бэс ыйын 1 күнүгэр күүһүгэр киирэр. Бу иннинэ хааччахтыыр миэрэлэр ыам ыйын 31 күнүгэр диэри этилэр. 
Ол ыйаахха олоҕуран, дискотекалар, араас саататар, ону сэргэ спортивнай тэрээһиннэр, ол иһигэр пааркаҕа, туристическай баазаларга бобуллубуттара.

Итини сэргэ өрөспүүбүлүкэ территориятыгар оҕолору саататар кииннэр уонна оонньуур хостор үлэлэрэ тохтотуллубута. Бүддьүөт тэрилтэлэрин үлэһиттэрин 50% дьиэттэн олорон үлэлиир көрүҥҥэ көспүтэ. 
Ил Дархан ыйааҕынан гражданнар бары уопсастыбаннай тырааныспарга, таксига, атыы эбийиэктэригэр, араас өҥө оҥоһуллар сирдэригэр мааскалаах сылдьаллара ирдэнэр. 
Маны сэргэ Айсен Николаев олохтоохтору маассабай вакцинацияҕа ыҥырда. Эбии пууннар Дьокуускай автовокзалыгар, Аллараа Бэстээх тимир суолун вокзалыгар, култуура тэрилтэлэригэр уонна атыы кииннэригэр аһыллыбыттар.