Хааччахтааһын миэрэлэрин тутуһуу бэрэбиэркэлэнэр

Сэтинньи 22 күнүттэн 28 күнүгэр диэри салалта территориальнай уорганнарын исписэлиистэрэ уонна олохтоох дьаһалта Суһал штабын холбоһуктаах бөлөҕө  266 эбийиэги, ол иһигэр 34 оптуобуһу уонна 63 түүҥҥү тэрилтэни бэрэбиэркэлээбиттэр. Эриэйдэ түмүгүнэн коронавирус инфекциятын тарҕаппат сыаллаах ирдэбиллэри кэһии 22 түбэлтэтэ биллибит. Бу туһунан Уокуруктааҕы дьаһалта пресс-сулууспата иһитиннэрдэ. 
«Төһө да маассабай тэрээһиннэри ыытыыга бобуу, үлэлэрин эрэсиимигэр хааччахтааһын киирбитин үрдүнэн, түүҥҥү саататар тэрилтэлэр ирдэбили кэһэллэрин тохтоппоттор.  Ааспыт нэдиэлэҕэ дискотекалары ыытыы уонна үлэ эрэсиимин кэһии иһин аакталар толорулуннулар, ол – «Hajime» түүҥҥү кулуупка, «City Hall» банкет саалатыгар, «Voblako» паровой коктейль Киинигэр сыһыаннаах», – диэн иһитиннэрбит  Административнай хамыыһыйа бэрэссэдээтэлэ Феликс Антонов.
Бэрэбиэркэ түмүгүнэн 68 сэрэтэр бэсиэдэ ыытыллыбыт, СӨ КоАП 3.8 ыст. 2 боротокуол толоруллубут. 
Автодорожнай уокурукка 14 эбийиэк бэрэбиэркэлэммит, хааччахтааһын ирдэбиллэрин 3 кэһии биллибит, 1 боротокуол толоруллубут. Киин уокурукка 22 эбийиэк хонтуруолламмыт, 1 кэһии булуллубут, 1 боротокуол оҥоһуллубут. Гагаринскай уокурукка 28 эбийиэк бэрэбиэркэлэммит, Губинскайга – 36, Октябрьскайга – 32, Промышленнайга – 8, Сайсары уокуругар – 8, Мархаҕа – 13, кэһии булуллубатах. Строительнай уокурукка эриэйдэ ыытыллыбатах.
Суһал штаб холбоһуктаах бөлөҕө  42 эбийиэги бэрэбиэркэлээбит, онтон 34-дэ – оптуобус, 14 кэһии баара биллибит.
Нэдиэлэ устата уокуруктарга уонна куорат кытыытыгар 25 боротокуол толоруллубут, 26 ыйыы бэриллибит.