Хааччахтааһын миэрэлэрин сымнаттылар

Хааччахтааһын миэрэлэрин сымнаттылар, ол эрэн муус устар  1 күнүгэр диэри үрдүк бэлэмнээх буолуу эрэсиимэ салҕанар. Бу туһунан брифиҥҥэ регионнааҕы Суһал штаб салайааччытын солбуйааччы Ольга Балабкина иһитиннэрдэ.
«Өрөспүүбүлүкэ баһылыга Айсен Николаев Ыйааҕынан саҥа коронавирус инфекциятынан үрдүк бэлэмнээх буолуу эрэсиимэ 2022 сыл муус устар  1 күнүгэр диэри уһатылынна. Ол эрэн, санитарнай-эпидемиологическай быһыыны-майгыны учуоттаан, кэккэ хааччахтар уһуллубуттарыгар болҕомтону ууруохха наада», — диэтэ кини.
Ольга Балабкина бэлиэтээбитинэн, сымнатыы киллэриитин төрүөтүнэн эпидемиологическай балаһыанньа тупсубута буолла. 
Ол курдук, киинэ театрдара, театрдар уонна култуура дьиэлэрэ социальнай дистанцияны тутуһан, көрөөччү саалатын 70% толорон үлэлииллэрэ көҥүллэннэ.  
Итини кытта, киин куоракка фудкортар, аттракционнар, оҕо оонньуур хосторо арылыннылар.
Уопсастыбаннай аһылык тэрилтэлэрин үлэлиир чаастара хааччахтаммат буолла.
Маассабай тэрээһиннэр буолар сирдэрин 75% толорон, быһыыны ылбыттарын туһунан QR-кодтаах эбэтэр «отрицательнай» көрдөрүүлээх ПЦР-анаалыстаах гражданнары эрэ киллэрэн ыытыллаллар.