Губинскай уокурукка саҥа оскуола тутуллуоҕа

Бэҕэһээ, тохсунньу 18 күнүгэр, Дьокуускай куорат баһылыга Евгений Григорьев Губинскай уокурук олохтоохторун иннигэр отчуоттаата.

Губинскай уокурукка ааспыт 2022 сайына таһаарыылаахтык ааспыт. Ол курдук, уокурук 21 уонна 23 № -дээх икки оскуолатыгар улахан өрөмүөн ыытыллыбыта. Нэһилиэнньэни хаарбах туруктаах дьиэттэн көһөрүү аадырыстаах бырагырааматынан 22 кыбартыыра олохтооҕо  81 киһи саҥа дьиэҕэ киирии үөрүүтүн билбитэ. Бу көрдөрүүнү үүммүт 2023 сылга икки бүк улаатыннарар, ону сэргэ 53-с кыбаарталы комплекснай сайыннарыы иитинэн хаарбах дьиэлэри көтөрүү соруга турар.

Уокурукка тупсарыы үлэтин ыытыы чэрчитинэн маны сэргэ 202-с мкрн оҕо оонньуур балаһааккатын оборудованиета саҥардыллыбыт, 30 оонньуур, 1 спортивнай балаһааккаҕа, 1 тиэргэҥҥэ өрөмүөн үлэтэ ыытыллыбыт. Саҥа өрөмүөннэммит Рыжиков скверигэр эбии С.З. Борисовка аналлаах сквер уонна пааматынньык арыллан, уокурукка күөх туона эбиллибит. Ыытыллыбыт үлэлэргэ ыйыллыбыт итэҕэскэ-быһаҕаска баһылык Салайар хампаанньалар болҕомтолорун хатаата.
Олохтоох нэһилиэнньэ куорат сөтүөлүүр сирин тупсаран оҥорууну,  
саҥа оптуобус маршруттарын, Роман Дмитриев набережнайын, саҥа оскуоланы тутууну туруоруста.
Киин куорат биир саамай элбэх нэһилиэнньэлээх 202 мкрн уонна 203 мкрн оскуола тиийбэтинэн баһылык 203 мкрн 2024 сыл бүтүөр диэри саҥа оскуоланы тутуу боппуруоһа быһаарыллар кыахтааҕын бэлиэтээтэ. 
2023 сылга Губинскай уокурук икки улахан уулуссатын - Б. Чижик уонна Хабаров уулуссаларын - улахан өрөмүөн күүтэр.
Маны сэргэ "Сырдык столица" муниципальнай бырагырааманан Ларионов уулуссатын хаалбыт учаастагар уот холбоноро, хас да сквергэ тупсарыы үлэтэ былааннанар.