Грипп уонна ОРВИ ыарыыларын утары сэрэтэр миэрэлэри дьүүллэстилэр

Мунньахха эпидемиологическэй быһыыны-майгыны дьүүллэстилэр уонна куораттааҕы үөрэҕирии тэрилтэлэригэр COVID-19 уонна ОРВИ, грипп ыарыылара тарҕамматтарын сэрэтэр миэрэлэри киллэрии туһунан быһаарыыны ылыннылар.

Роспотребнадзор Саха сиринээҕи управлениетын информациятынан, ааспыт нэдиэлэҕэ өрөспүүбүлүкэҕэ ОРВИ-нан ыалдьыы 3851 түбэлтэтэ регистрацияланна, Дьокуускай куоракка 2261 киһи ыарыйда. Лабораторнай кэтээн көрүү дааннайдарынан, өрөспүүбүлүкэ территориятыгар «гриппознайа» суох көрүҥнээх вирустар – риновирустар, парагрипп вирустар, RC-вирустар, аденовирустар, бокавирустар тарҕаммыттар. Итилэртэн саамай элбэхтик риновирус көстөр.

Санитарнай-эпидемиологическэй хамыыһыйа мунньаҕын түмүгүнэн COVID-19 уонна ОРВИ, грипп ыарыылара тарҕамматтарын сэрэтэр кэккэ миэрэлэри ылыннылар.

Ол курдук, Үөрэҕирии, Култуура уонна духуобунай сайдыы, Физическэй култуура уонна спорт управлениеларыгар, уопсай үөрэхтээһин уонна эбии үөрэхтээһин тэрилтэлэрин салайааччыларыгар бэлэмнэнии үлэтин ыытарга, үөрэнэр сирдэри салгылатарга, салгыны ырааһырдар, дезинфекциялыыр тэриллэринэн,  термометрдарынан уо.д.а. хааччынарга сорудахтаатылар.

Үөрэҕирии тэрилтэлэригэр үөрэнээччи ахсаанын кэтээн көрүү ыытыллар, биир кылааска 20%-тан тахса оҕо грипп, ОРВИ уонна COVID-19 түмүгэр ыалдьан үөрэнэ кэлбэт түбэлтэтигэр үөрэх тохтуур. Күн аайы, бэрэбиэркэ түмүгүнэн, үрдүк температуралаах уонна инфекционнай ыарыылаах үөрэнээччилэри дьиэлэригэр төттөрү ыытыахтара.

Роспотребнадзор Саха сиринээҕи управлениета өрөспүүбүлүкэҕэ грипп ыарыытын утары быһыы туруорааһына саҕаламмытын санатар. Вакцинанан Дьокуускай бары медицинскэй тэрилтэлэрэ хааччылыннылар.

Былаан быһыытынан киин куорат нэһилиэнньэтин 60%-на быһыыны ылыахтаах ((223 тыһыынча киһи, ол иһигэр 72 тыһыынча оҕо уонна 151 тыһыынча улахан киһи).