Горнай улууһун Бэс-Күөл сэлиэнньэтин 185 олохтооҕор көмө оҥоһуллуоҕа

Ойуур баһаарыттан эмсэҕэлээбит Горнай улууһун Бэс-Күөл сэлиэнньэтин 185 олохтооҕор 30-туу тыһыынча солкуобай көмө оҥоһуллар. 
«Баһаартан сэрэхтээх нэһилиэнньэлээх пууннарга олорор гражданнары баҕа өттүлэринэн эвакуациялыыр пууннарга илдьэллэр, олорор сиринэн уонна аһылыгынан хааччыйаллар», – диэтэ брифиҥҥэ өрөспүүбүлүкэ суһал штабын салайааччытын солбуйааччы Ольга Балабкина.
Итини сэргэ баһаартан эмсэҕэлээбит дьону күннээҕи туттар тэрилинэн, таҥаһынан хааччыйар боппуруос турар. 
«Көмө оҥорорго судаарыстыбаннай уонна муниципальнай, ону таһынан аһымал үп туттуллар. Алта аҕам саастаах киһи реабилитациялыыр кииҥҥэ киирэр баҕа санааларын биллэрдилэр. Итини таһынан аҕыс саастарыттан үөһээ уон оҕо бөлөҕө „Орленок“ лааҕырга барыаҕа. Билиҥҥи кэмҥэ тэрийии боппуруостара быһаарыллар. Горнай улууһун территориятыгар Саха сирин үлэҕэ уонна социальнай сайдыыга миниистирин солбуйааччы Иван Алексеев үлэлиир. Дьон кыһалҕатынан үлэ барыта Ил Дархан Айсен Николаев тус хонтуруолугар сылдьар», – диэн эбэн эттэ Ольга Балабкина.